Bakının fəvvarələrindən ilhamlanan rəssamlar – “Kiçik QalArt”da ekoloji səyahət
Bakı, 1 noyabr, Gülay Nəzərova, AZƏRTAC
Bakı şəhərinin əsrarəngiz parklarında fəvvarələrin axan suları yalnız gözəllik yaratmır, həm də insanların hərəkətini, şəhərin ritmini və canlılığını əks etdirir. Hər gün insanların ətrafında dayandığı, şəkil çəkdiyi və istirahət etdiyi bu məkanlar şəhərin yaddaşını daşıyır. Eyni zamanda, bu fəvvarələr yaradıcı sənətkarların fikirlərini, ekoloji mesajlarını və şəhərin gündəlik həyatına dair fərqli baxışlarını ifadə etməsi üçün ilham mənbəyinə çevrilir.
Noyabrın 1-də paytaxtda keçirilən “Art Weekend” - beynəlxalq incəsənət festivalı çərçivəsində İçərişəhərdəki “Kiçik QalArt” qalereyasında açılan “Axın halı” sərgisi də məhz bu ideya üzərində qurulub: şəhərin fəvvarələri rəssamların əsərlərində həm vizual, həm də mənəvi anlam kəsb edir, tamaşaçılara həm gözəlliyi, həm də suyun və şəhərin ritminin dərin mesajını çatdırır.
Sərginin kuratorları Sitarə İbrahimbəyli, Məhinbanu Səfixanlı və Lesli Qreydir.
AZƏRTAC-ın müxbiri şəhərin fəvvarələrindən ilhamlanaraq əsərlər yaradan rəssamlarla həmsöhbət olub.
Su Bakının hərəkətinin, dəyişiminin və inkişafının metaforasıdır
Multimedia sənətçisi, sərginin kuratoru Sitarə İbrahimbəyli bildirib ki, layihə çərçivəsində 7 rəssamın şəhər mərkəzində yerləşən fəvvarələrdən ilhamlanaraq ictimai sənət əsərləri yaradılıb. Hər bir əsər həmin məkanın şəxsi və ya ictimai hekayəsini danışır: “Bakı fəvvarələr şəhəridir və burada ictimai və şəxsi həyatlar kəsişir, bir-birinə qarışır. Su Bakının hərəkətinin, dəyişiminin və inkişafının metaforasıdır: şəhərin və sakinlərinin dinamik yaddaşı, onun axınının ifadəsidir”.
“Bürc fəvvarəsi”
Rəssam Günel Cəfərova bildirib ki, əsərində fəvvarələri bürclərlə əlaqələndirib: “Fikrimcə, hər bir insan öz bürcünün xüsusiyyətlərini daşıyır. Mən də bu ideyanı fəvvarələr vasitəsilə ifadə etdim. “Bürc fəvvarəsi” bizi yansıdan su axını kimi tərtib olunub – su daim hərəkətdədir, dəyişir, amma mahiyyətcə eyni qalır. İnsanlar arzularını suya söyləyir, çünki suyun yaddaşı var. O buxarlanaraq kainatla birləşir və bəzən arzular elə həmin axınla gerçəkliyə qovuşur”.
“Gizli axın”
Rəssam Elnur Musayev bu əsərdə insanla təbiət arasındakı görünməz əlaqəni ifadə edib: “Bu əsər sonsuzluğu təcəssüm etdirir. O, heçlikdən doğur, amma heçliyin özünü deyil – başlanğıcı ifadə edir. Burada insanın səsi, onun təbiətlə münasibəti və daxili əlaqəsi var. Əsərdə yer alan hər bir parça bir xatirə daşıyır, bu geyimlər insanların olub. Əslində əsərin mərkəzində gizli bir qüvvə dayanır – bu, sudur. Bu iş üçün 250 min litr su istifadə olunub. Suyun yaddaşı var və bu yaddaş əbədidir. Sadəcə forması dəyişir, axını isə davam edir. Əsər də elə bu davamlılığı – insanla təbiət arasındakı sonsuz dövranı ifadə edir”.
“Fəvvarələr teatrı”
Rəssam Aydın Bağırov fəvvarələrin ətrafını teatr səhnəsinə bənzədib. Bu əsər şəhər mühitini canlı bir tamaşa kimi təqdim edir. İnsanların addımları, uşaqların gülüşü, ağacların yarpaqlarından süzülən külək səsi — hamısı bu səhnənin görünməyən musiqisini yaradır.
Əsərdə teatrın dinamikası ilə suyun axıcılığı bir nöqtədə qovuşur. Bu isə tamaşaçını həm real, həm də simvolik dünyaya aparır — suyun yaddaşında qorunan hisslər, baxışlar və anlar əsərin görünməyən qatlarında yaşamağa davam edir.
Beləliklə, sərgi şəhərin fəvvarələrini yalnız estetik obyekt kimi deyil, həm də həyatın, təbiətin və insanın bir-biri ilə bağlılığını ifadə edən canlı simvol kimi təqdim edir.
Sərgi noyabr ayı ərzində nümayiş olunacaq.
Bölmənin digər xəbərləri
