Bakının Xətai rayonunda bələdiyyə seçkiləri şəffaf və demokratik şəkildə keçir
Bakı, 23 dekabr, Anar Rzayev, AZƏRTAC
33 saylı Xətai birinci seçki dairəsi 37 məntəqəni əhatə edir. Məntəqələrdə 44195 seçici qeydə alınıb.
Dairə seçki komissiyasının sədri Əlibaba Məmmədov AZƏRTAC-a bildirib ki, səhər saat 8.00-dan məntəqələrdə səsvermə başlanıb. Hələlik dairə seçki komissiyasına qanun pozuntusu barədə heç bir məlumat və şikayət daxil olmayıb. Dairədə bələdiyyə seçkilərinə yüksək səviyyədə hazırlıq görülməsi səsvermənin şəffaf və mütəşəkkil keçməsinə imkan yaradır.
35 saylı Xətai ikinci seçki dairəsinin sədri Rafael Mehdiyevin verdiyi məlumata görə, dairə 35 məntəqəni əhatə edir və 42 929 seçici qeydə alınıb. Dairə sədri bildirib ki, səhər saatlarından etibarən seçicilərin fəallığı müşahidə olunur. Müşahidəçilər səsvermənin gedişini yaxından izləyirlər.
35 saylı Xətai üçüncü seçki dairəsinin sədri İmran Hüseynəliyev də seçkilərin mütəşəkkil və demokratik keçdiyini, nəticələrə mənfi təsir edə biləcək amillərin olmadığını bildirib. Qeyd edib ki, seçici siyahıları ilə hər kəsin yaxından tanış olması üçün hər bir məntəqədə siyahılar asılıb.
36 saylı Xətai dördüncü seçki dairəsinin sədri Tahir Süleymanov vurğulayıb ki, 37 məntəqənin əhatə olunduğu dairədə 44 min 756 seçici qeydə alınıb.
Məntəqələrdə səsvermə prosesini izləyən müxtəlif partiyaların nümayəndələri və bitərəf müşahidəçilər hələlik heç bir qanun pozuntusuna rast gəlmədiklərini, seçkilərin şəffaf və demokratik, beynəlxalq normalara uyğun keçirildiyini bildirirlər.
Bölmənin digər xəbərləri
