“Bakıya Uçuş. İncəsənət Həftəsonu. Gələcəyi İNDİ Duy” festivalında üç proqram təqdim ediləcək VİDEO
Bakı, 27 oktyabr, Günel Alıyeva, AZƏRTAC
Heydər Əliyev Fondu və Mədəniyyət Nazirliyinin tərəfdaşlığı ilə təşkil olunacaq “Bakıya Uçuş. İncəsənət Həftəsonu. Gələcəyi İNDİ Duy” (Fly to Baku. Art Weekend. Sense the Future NOW) festivalında üç proqram təqdim ediləcək.
AZƏRTAC xəbər verir ki, festival ərəfəsində şairə və “Söz” İncəsənət Multidisiplinar Mərkəzinin yaradıcısı Nigar Həsənzadə layihə çərçivəsində hazırlanmış proqram haqqında danışıb.
Nigar Həsənzadənin sözlərinə görə, oktyabrın 31-dən noyabrın 2-dək davam edəcək üçgünlük zəngin proqrama paytaxtın müxtəlif məkanlarında keçiriləcək 40-dan çox tədbir daxildir. Mərkəzin komandasının hər biri xüsusi olaraq festival üçün yaradılmış üç orijinal proqram hazırlayıb.
İlk proqram noyabrın 1-də saat 18:00-da YARAT Müasir İncəsənət Mərkəzində keçiriləcək və “Savalan” qrupu və “Çardaq” ansamblının solistlərinin iştirakı ilə etnosufi musiqisi və melodeklamasiyalar axşamı təqdim edəcək.
Həmsöhbətimiz qeyd edib ki, canlı etnik musiqinin, ehtiraslı vokal partiyaların və dahi Şərq şairlərinin misralarının birləşməsi inanılmaz dərəcədə dərin - mənəvi, ilhamverici və həqiqətən bədii bir atmosfer yaradacaq.
İkinci proqram isə noyabrın 2-də saat 17:00-da Dövlət Uşaq Filarmoniyasının tələbələri ilə keçiriləcək uşaq yaradıcılıq gecəsidir. Tamaşa Leyla Əliyevanın poeziyası əsasında hazırlanıb və xoreoqrafiya, vokal, deklamasiya, bədii gimnastika və aktyorluq sənətini birləşdirir.
“Söz” Mərkəzinin iştirakı ABŞ, Portuqaliya, Mərakeş və Türkiyədən olan tanınmış şairlər - Manuel Ayris, Luis Felipe Sarmento, Hasan Nacmi və Ataol Behramoğlunun beynəlxalq poeziya axşamı ilə başa çatacaq. Onlarla birlikdə Azərbaycan poeziyasının korifeyləri — xalq şairləri Vahid Əziz və Sabir Rüstəmxanlı, eləcə də şair Vaqif Bəhmənli çıxış edəcəklər. Şairənin vurğuladığı kimi bir çox xarici müəllif Azərbaycana gələcək və burada ilk dəfə çıxış edəcəklər. N.Həsənzadə qeyd edib ki, festival beynəlxalq yaradıcılıq əlaqələrinin gücləndirilməsi, multidisiplinar incəsənətin inkişafında və Azərbaycanın mədəni irsinin təbliğində mühüm rol oynayır. O, bütün paytaxt sakinlərini və qonaqları bu möhtəşəm tədbirlərin bir parçası olmağa dəvət edib və festivalın rəsmi saytında qeydiyyatın pulsuz olduğunu xatırladıb.
“Tamaşaçılarımızla görüşü səbirsizliklə gözləyirik və onlara unudulmaz emosiyalar yaşatmağı ümid edirik”, - deyə Nigar Həsənzadə bildirib.
Qeyd edək ki, festivalda iştirak etmək üçün onlayn qeydiyyat tələb olunur. Qeydiyyatdan keçmiş bütün iştirakçılara elektron poçt vasitəsilə QR kod göndəriləcək. Festivala dəstək göstərən əsas təşkilatlardan biri olan “Regional İnkişaf” İctimai Birliyinin könüllüləri QR kodlarını yoxlayacaq və qonaqlara tədbir məkanlarında düzgün istiqamətləndirəcəklər.
Uşaqları əyləncə proqramında iştirak edəcək valideynlər də qeydiyyatdan keçməlidirlər.
Festivalın bütün tədbirləri pulsuzdur və geniş auditoriya üçün açıqdır. “Bakıya Uçuş. İncəsənət Həftəsonu. Gələcəyi İNDİ Duy” layihəsinin rəsmi saytında qeydiyyatdan keçmək mümkündür: www.bakuartweekend.az.
Əlavə məlumat və suallar üçün [email protected] ünvana müraciət etmək olar.
Bölmənin digər xəbərləri
