Balaxanı poliqonunda bütün zərərli maddələr üzrə göstəricilərin azalması aşkar olunmuşdur
Bakı, 25 fevral (AZƏRTAC). “Təmiz Şəhər” ASC tərəfindən Balaxanı məişət tullantılarının zərərsizləşdirilməsi poliqonunun ətraf mühitə təsirlərini öyrənmək məqsədi ilə monitorinq keçirilmişdir.
ASC-dən AZƏRTAC-a verilən məlumata görə, monitorinq zamanı suda və səth torpaq örtüyündə ağır metalların həcmi, havada kimyəvi birləşmələrin miqdarının azalması aşkar olunmuşdur.
Havanın monitorinqi göstərir ki, PM10 tozlarının miqdarı dəfələrlə aşağı düşmüş, kükürd, azot dioksid, həmçinin hidrogen sulfid qazlarından başqa bütün digər qazlar yol verilən qatılıq həddindədir.
Eyni zamanda, Balaxanı poliqonuna nəql edilən tullantıların Böyük Şor gölünə boşaldılmasının qarşısı alınmış, ərazidə ekoloji yumşaldıcı tədbirlərin görülməsi nəticəsində su hövzəsinə mənfi təsirlər azaldılmışdır. Su nümunələrinin müqayisəli analizi göstərir ki, artıq bütün elementlərin miqdarı normaya uyğundur.
Bundan başqa, torpağın tərkibində ağır metalların miqdarının tədricən azalması müşahidə olunmuşdur. Poliqondan götürülmüş torpaq nümunələrində kadmium, qurğuşun və civə kimi ağır metallar yol verilən qatılıq həddində olduğu müəyyən edilmişdir.
Balaxanı məişət tullantılarının zərərsizləşdirilməsi poliqonunda vaxtilə baş verən yanğın və tüstülənmə hallarının qarşısı da alınmışdır.
Bölmənin digər xəbərləri
