Başını dik tut, Türkiyə: Dövlət və millət olaraq yanındayıq!
Bakı, 13 fevral, AZƏRTAC
Dünyanın etnik və siyasi xəritəsi həddən artıq rəngarəng və müxtəlifdir. İrili-xırdalı dövlətlərin sayından dəfələrlə çox millətlər var. Bu siyasi-etnik müxtəliflik mühitində ən yaxın dostluq və əməkdaşlıq münasibətindən tutmuş, barışmaz düşmənçiliyə qədər fərqli vəziyyətlər yaşanır. Amma bütün bu münasibətlər içərisində iki xalq, iki dövlət arasında rast gəlinməyən bir yaxınlıq var ki, bunun adı heç bir siyasi terminlə ifadə oluna bilməz. Azərbaycan-Türkiyə münasibətləri siyasi müttəfiqlik, iqtisadi əməkdaşlıq, humanitar yaxınlıqdan və bunların hamısının cəmindən üstün bir haldır.
Bu sözləri AZƏRTAC-a açıqlamasında Milli Məclis sədrinin müavini Fəzail İbrahimli deyib.
F.İbrahimli bildirib ki, 100 il əvvəl Çanaqqala döyüşlərində türklərlə yanaşı, azərbaycanlıların, 1918-ci ildə isə Nuru Paşanın rəhbərliyi ilə Azərbaycana gələn türk əsgərlərinin Bakının azad olunmasında iştirakı dünya tarixində digər heç bir iki dövlət və xalq üçün rast gəlinməyən, analoqu olmayan faktlardır. Dünya tarixində ikinci belə hadisə yoxdur ki, bir xalq digər dövlətin istiqlalı uğrunda qan töksün, can versin. Siyasi təzyiqlər, imperializm belə bu münasibəti dəyişə bilməyib. Türkiyənin istiqlalının ilk illərində sovet işğalı altında olan Azərbaycandan qardaş ölkəyə təmənnasız pul, qızıl, neft və neft məhsulları göndərilib və “Qardaş qardaşa borc verməz” deyilib. Qars müqaviləsi ilə Naxçıvanın Azərbaycanın himayəsinə verilməsi, ərazisinin muxtariyyət statusu çərçivəsində Azərbaycan tərəfdən heç bir dövlətə güzəştə gedilməməsi məhz Türkiyə Cümhuriyyətinin diplomatik dəstəyi idi. Dahi şəxsiyyət Mustafa Kamal Atatürkün “Azərbaycanın sevinci sevincimiz, kədəri kədərimizdir!” şüarı həm də dövlət siyasətinə çevrildi və Azərbaycanın istiqlala qovuşması ilə iki qardaş ölkə arasındakı mənəvi tellər siyasi, iqtisadi müttəfiqliklə elə bir səviyyədə möhkəmləndi ki, Ulu Öndər Heydər Əliyevin “Bir millət, iki dövlət!” kimi dahiyanə kəlamı yüzillik birliyi ifadə edən əbədi möhür oldu.
Azərbaycan-Türkiyə qardaşlığı Prezident İlham Əliyev və Prezident Rəcəb Tayyib Ərdoğanın sayəsində bu gün ən yüksək zirvəsinə çatıb. Ötən əsrdə Balkan müharibəsi zamanı Azərbaycanın Dövlət Himninin sözlərinin müəllifi Əhməd Cavad azərbaycanlı gənclərlə birlikdə Osmanlı ordusunun sıralarında döyüşdüyü, Çanaqqalada Azərbaycandan gələn igidlərlə Anadolu dəliqanlıları birlikdə mübarizə aparıb şəhadətə ucaldığı, zəfər qazandığı, Qafqaz İslam Ordusunun aslanları - Nuru Paşanın əsgərləri Bakının azadlığı uğrunda birgə savaşdığı kimi, 2020-ci il dekabrın 10-da Bakıda Zəfər paradında da iki dövlətin liderləri çiyin-çiyinə Türkiyə və Azərbaycan əsgərlərinin Azadlıq meydanında birgə keçidini izlədi. Bu, həm də qardaşlığın zəfər təntənəsi idi.
Bu gün bu qardaşlıq daha bir sınaqdan üzüağ çıxmaqdadır. Fevralın 6-da Türkiyə tarixində ən faciəli zəlzələ hadisəsi baş verdi. Gecə saatlarında mərkəzi Kahramanmaraş olmaqla, 10 vilayətdə baş verən zəlzələlər nəticəsində on minlərlə insan həyatını itirdi, on minlərlə insan yaralandı və dağıntılar altında qaldı. Bu dəhşətli hadisəyə ilk səs verən qardaş Azərbaycan oldu. Bu xəbər Türkiyə kimi, Azərbaycanı da kədərə bürüdü. Prezident İlham Əliyev zəlzələnin baş verdiyi gün səhər Türkiyə Prezidenti Rəcəb Tayyib Ərdoğana zəng edərək qardaş ölkədə baş vermiş zəlzələ nəticəsində çoxsaylı insan tələfatı və dağıntılarla bağlı xəbərin Azərbaycanı çox sarsıtdığını və kədərləndirdiyini bildirdi. Dövlətimizin başçısının göstərişi ilə Azərbaycan ilk dəqiqələrdən, ilk saatlardan öz dəstəyini göstərdi. Bu gün də ölkəmizdən zəlzələ zonasına davamlı olaraq həkimlər, xilasedicilər, könüllülər göndərilir və göndəriləcək. Eyni zamanda, Birinci vitse-prezident Mehriban xanım Əliyevanın tapşırığı ilə Heydər Əliyev Fondu tərəfindən qardaş ölkəyə böyük dəstək göstərilir. Ölkədə bütün qurumlar səfərbər olub. Amma bütün rəsmi fəaliyyət bir yana, qardaş ölkəyə yardımlarda sadə vətəndaşlarımızın da fəal iştirakı qürurvericidir. Bu gün Azərbaycan xalqının könüllü olaraq qardaş ölkəyə yardımlar göstərməsi ilə bütün dünyaya bir daha göstəririk ki, təkcə dövlətlərarası, dövlət başçıları deyil, sadə vətəndaşlar səviyyəsində də əsl qardaşlıq əlaqələri mövcuddur. Nəinki paytaxt Bakıda, respublikamızın müxtəlif bölgələrində də vətəndaşlarımız türk qardaş və bacılarımıza dəstək olmaq üçün bütün imkanlarını səfərbər edib. Sadə vətəndaşlarımızın fədakarlığı hər kəsi duyğulandırmaqla yanaşı, qürur hissi yaradır. Bütün bunlar bir daha təsdiqləyir ki, sadə insanlar səviyyəsində də əsl qardaşlıq, mənəvi amillər bizi bir-birimizə bağlayır. Bu, sözün həqiqi mənasında, iki dövlətə malik bir millət örnəyidir!
“Budur, çətin günün sınağından çıxmaq. Budur, bir millət, iki dövlət münasibəti. Doğrudur, bu gün Türkiyə kimi güclü bir dövlətin Azərbaycanla bir olması çoxlarında qısqanclıq yaradıb. Amma bir məqamı anlamaq lazımdır ki, Azərbaycan-Türkiyə əlaqələri illərin sınağından çıxıb, bu birlik möhkəmlənib. Bu birliyi isə heç bir qüvvə sarsıda bilməz. Bir sözlə, Ulu Öndər Heydər Əliyevin “Bir millət, iki dövlət!” kəlamı bu gün, sadəcə olaraq, kəlam deyil, gerçəkdir. Bu reallıq artıq bütün sahələrdə sübuta yetirilməkdədir. Əminik ki, tezliklə qardaş Türkiyə bu sınaqdan da üzüağ çıxacaqdır. Türkiyə-Azərbaycan birliyi sarsılmazdır və ağır günlərdə iki qardaş dövlət həmişə bir-birinin yanındadır. Dövlətimizin başçısının dediyi kimi: “Bütün dünyaya göstərdi ki, Türkiyə-Azərbaycan birliyi sarsılmazdır və ağır günlərdə biz bir-birimizin yanındayıq. Bəli, qardaş Türkiyə bütün sınaqlardan uğurla çıxdığı kimi, bu sınaqdan da üzüağ çıxacaq, biz də dövlət və xalq olaraq sona qədər Türkiyənin yanında olacağıq”, - deyə Milli Məclis sədrinin müavini qeyd edib.
Bölmənin digər xəbərləri
