BDU-da Azərbaycanda “Ərəb dili ayı”nın açılış mərasimi keçirilib
Bakı, 18 avqust, AZƏRTAC
Səudiyyə Ərəbistanı Krallığında fəaliyyət göstərən Kral Salman adına Beynəlxalq Ərəb Dili Akademiyasının təşəbbüsü ilə avqust ayı Azərbaycanda “Ərəb dili ayı” elan olunub. Bakı Dövlət Universitetində (BDU) “Ərəb dili ayı”nın rəsmi açılış mərasimi keçirilib.
AZƏRTAC xəbər verir ki, əvvəlcə Azərbaycan Respublikası və Səudiyyə Ərəbistanı Krallığının Dövlət himnləri səsləndirilib.
Bakı Avrasiya Universitetinin Ərəbşünaslıq Mərkəzinin direktoru dosent Ülviyyə Hüseynova “Ərəb dili ayı”nın məqsədi, əhəmiyyəti və tədbirin proqramı barədə məlumat verib.
Bakı Dövlət Universitetinin rektoru Elçin Babayev çıxışında ərəb dilinin dünyanın ən qədim və zəngin dillərindən biri olduğunu, əsrlər boyu Şərq və Qərb arasında elmin, ədəbiyyatın və mədəniyyətin körpüsü kimi bəşər sivilizasiyasının inkişafında mühüm rol oynadığını bildirib. Rektor qeyd edib ki, Azərbaycan xalqının ərəb dili ilə əlaqəsi qədim tarixə dayanır. İslam dünyası ilə mədəni, dini və elmi münasibətlərimizin əsas sütunlarından biri məhz ərəb dilidir. Əsrlər boyu Azərbaycan alimləri bu dil vasitəsilə böyük İslam mədəniyyətinə qoşulub, öz elmi irsini ərəb dünyasına təqdim ediblər. Bu missiyanın ən böyük daşıyıcılarından biri BDU və onun Şərqşünaslıq fakültəsidir. Professorlar Ələsgər Məmmədov, Rəhim Sultanov, Həsən Mahmudov, Mübariz Əlizadə, Aida İmanquliyeva, akademik Vasim Məmmədəliyev və bir çox başqa görkəmli şəxsiyyətlər ərəb dili və ədəbiyyatının Azərbaycanda öyrənilməsi və tədrisinin əsas sütunlarını yaradıblar. Bu ənənəni davam etdirən müasir alimlərimiz var. Onların elmi fəaliyyəti nəticəsində Azərbaycan şərqşünaslığı dünya elminin ayrılmaz hissəsinə çevrilib: “Azərbaycan ərəbşünaslıq məktəbinin formalaşmasında böyük rolu olan alimlərin zəngin elmi irsi bu gün də gənc tədqiqatçılar üçün örnəkdir. BDU-nun Ərəb filologiyası kafedrası Şərqşünaslıq fakültəsinin əsas tədris və elmi-tədqiqat mərkəzlərindən biridir. Kral Salman adına Beynəlxalq Ərəb Dili Akademiyası ilə mümkün əməkdaşlıq layihələri universitetin tədris və tədqiqat imkanlarını daha da zənginləşdirə və gənclərimiz üçün yeni perspektivlər aça bilər. Son illərdə Bakı Dövlət Universiteti ərəb dünyasının bir sıra ölkələri ilə əməkdaşlıq əlaqələrini gücləndirib. Bir sıra ərəb ölkələrinin Azərbaycandakı səfirləri ilə görüşlər keçirilib, yeni layihələr müzakirə olunub. BDU-da ərəb dilinin tədrisini inkişaf etdirmək və ərəb dünyası ilə əlaqələri gücləndirmək üçün ardıcıl addımlar atılır. Əminik ki, bu fəaliyyət gənclərimizin elmi və peşəkar inkişafına, ölkələrimiz arasında qarşılıqlı dostluq və əməkdaşlıq körpüsünün daha da möhkəmlənməsinə xidmət edəcək”.
Kral Salman adına Beynəlxalq Ərəb Dili Akademiyasının baş direktoru Abdullah bin Saleh əl-Vaşmi Azərbaycan ilə ərəb dünyası arasında dostluq və əməkdaşlıq münasibətlərinin əhəmiyyətini vurğulayıb. Qeyd edib ki, Bakı Dövlət Universitetində “Ərəb dili ayı”nın keçirilməsi yalnız elmi-mədəni hadisə deyil, həm də ölkələr arasında strateji tərəfdaşlığın dərinləşməsi üçün yeni imkanlar açır.
Səudiyyə Ərəbistanı Krallığının Azərbaycan Respublikasındakı səfiri İssam bin Saleh əl-Cuteyli bildirib ki, ərəb dili bütün dövrlərdə bəşəriyyətin ən qədim və mühüm dillərindən biri sayılıb. Ərəb dili 1973-cü ildən BMT Baş Assambleyasının rəsmi dillərindən biridir. Kral Salman adına Beynəlxalq Ərəb Dili Akademiyası ərəb dilinin qorunması, inkişafı istiqamətində mühüm işlər görməkdədir. Kral Salman Beynəlxalq Ərəb Dili Akademiyasının təşkil, Bakı Dövlət Universiteti ilə Bakı Avrasiya Universitetinin ev sahibliyi etdiyi “Ərəb dili ayı” Səudiyyə Ərəbistanının ərəb dilinə göstərdiyi diqqətin, onun müxtəlif xalqlara tanıdılmasının açıq göstəricisidir. Orta əsrlərdə Azərbaycan alimləri, ədibləri və şairləri ərəb dilində dəyərli əsərlər yazaraq İslam mədəniyyətinin zənginləşməsinə böyük töhfə veriblər: “Sevindirici haldır ki, bu gün də Azərbaycanda ərəb dilinə böyük maraq var. Hazırda ölkədə 10 ümumtəhsil məktəbində və 6 nüfuzlu universitetdə ərəb dili tədris olunur. Biz inanırıq ki, ərəb dili mədəniyyətlər və xalqlar arasında körpü rolunu davam etdirəcək, ölkələrimiz və xalqlarımız arasında yaxınlaşmanı gücləndirəcək”.
Bakı Avrasiya Universitetinin rektoru Səyavuş Qasımov Azərbaycanda “Ərəb dili ayı”nın keçirilməsinin dil və mədəniyyətlərarası əlaqələrin inkişafına xidmət edən, təhsil və elmi əməkdaşlıq üçün yeni imkanlar açan əlamətdar bir hadisə olduğunu deyib. O bildirib ki, belə bir ayın təşkili ərəb dilinin respublikamızda yayılmasına, öyrənilməsinə və əsrlərlə formalaşmış mədəni irsimizin qorunmasına dəstəkdir: “Ərəb dilinin öyrənilməsi və tədrisi həm tarixi-mədəni irsimizin qorunması, həm də beynəlxalq əməkdaşlığın inkişafı baxımından mühüm əhəmiyyət daşıyır. Bu istiqamətdə atılan addımların daha da genişlənəcəyinə və yeni əməkdaşlıq imkanları yaradacağına inanırıq”.
Sonra Kral Salman adına Beynəlxalq Ərəb Dili Akademiyası haqqında tanıtım videosunun təqdimatı, Akademiyanın Əbcəd mərkəzində təhsil alan azərbaycanlı məzunların çıxışları olub.
Mərasimdə “Ərəb dili ayı”nın ilk iki həftəsində keçirilən ərəb dili üzrə şeir, qiraət və inşa müsabiqələrinin qalibləri mükafatlandırılıb.
Daha sonra “Ərəb dilinə dair 100 sual” kitabının təqdimatı və Azərbaycanda ərəb dilinin vəziyyəti ilə bağlı hesabat dinlənilib. Kral Salman adına Beynəlxalq Ərəb Dili Akademiyası haqqında tanıtım guşəsinə baxış keçirilib.
Mərasimin sonunda BDU-nun Mədəniyyət-Yaradıcılıq Mərkəzinin hazırladığı bədii proqram nümayiş olunub.
Bölmənin digər xəbərləri
