Belarusda Azərbaycan şəhidlərinin xatirəsi anılmışdır
Minsk, 21 yanvar (AZƏRTAC). Yanvarın 20-də Azərbaycanın Belarusdakı səfirliyində 20 Yanvar hadisələrinin 21-ci ildönümünə həsr olunmuş matəm mərasimi keçirilmişdir.
“Qanlı Yanvar” adlı xatirə gecəsində Azərbaycan səfirliyinin və diasporunun nümayəndələri, Belarus ictimaiyyətinin təmsilçiləri, Minskdə təhsil alan tələbələr, KİV nümayəndələri iştirak etmişlər.
Ölkəmizin Belarusdakı səfiri Əli Nağıyev gecəni açaraq 1990-cı ilin yanvarında baş vermiş faciəli hadisələr, hərbi cinayətkarların törətdiyi vəhşiliklər, qəhrəman oğul və qızlarımız barədə söhbət açmışdır.
Diplomat ümummilli lider Heydər Əliyevin ölkəmizin informasiya blokadasında boğulduğu bir vaxtda 1990-cı il yanvarın 21-də Azərbaycanın Moskvadakı daimi nümayəndəliyində çıxışının tarixi əhəmiyyətini diqqətə çatdırmışdır.
Sonda səfir demişdir ki, 20 Yanvar hadisələri və şəhidlərin qəhrəmanlığı Azərbaycan tarixinə xalqımızın müstəqillik mübarizəsinin rəmzi kimi daxil olmuşdur. Şəhidlərin xatirəsi qəlbimizdə əbədi yaşayacaqdır. Sonda ehsan verilmişdir.
Zeynal Ağazadə
AZƏRTAC-ın xüsusi müxbiri
Minsk
Bölmənin digər xəbərləri
