SİYASƏT
BENİLÜKS AZƏRBAYCANLILARI KONQRESİ AMSTERDAMDA AZƏRBAYCAN XALQ CÜMHURİYYƏTİNİN 90 İLLİYİNƏ HƏSR OLUNMUŞ KONFRANS KEÇİRMİŞDİR
Niderland Krallığının paytaxtı Amsterdamda Benilüks Azərbaycanlıları Konqresinin təşəbbüsü ilə “Azərbaycan - Şərqin ilk demokratik dövləti: keçmişdən gələcəyə 90 il” mövzusunda konfrans keçirilmişdir.
Xarici Ölkələrdə Yaşayan Azərbaycanlılarla İş üzrə Dövlət Komitəsindən AZƏRTAC-a bildirmişlər ki, tədbirdə Azərbaycanın Hollandiyadakı səfiri Fuad İsgəndərov, dipkorpusun, Azərbaycan və türk diasporunun nümayəndələri, yerli siyasi partiyaların üzvləri iştirak etmişlər.
Benilüks Azərbaycanlıları Konqresinin sədri Sahil Qasımov konfransın məqsədi barədə qonaqlara məlumat verdikdən sonra tarix elmləri doktoru, professor Musa Qasımlı Azərbaycan Xalq Cümhuriyyətinin yaranması və 23 aylıq fəaliyyəti barədə məruzə etmişdir. M.Qasımlı Şərqdə ilk demokratik dövlətin yaranmasının zərurəti, əhəmiyyəti və tarixi aspektləri barədə, Xalq Cümhuriyyətinin varisi olan müasir Azərbaycanda dövlət quruculuğu, ölkəmizin regionda lider dövlətə çevrilməsi, bölgədə yeri və rolu, ictimai, siyasi və iqdisadi sahələrdə nailiyyətləri haqqında məlumat vermişdir. Səfir Fuad İsgəndərov, Dövlət Komitəsinin nümayəndəsi T.Hacıyev Azərbaycan-Hollandiya münasibətlərinin dərinləşməsində Azərbaycan diasporunun qarşısında duran vəzifələrdən danışmışlar.
Konfransda Niderlandın siyasi partiyalarının təmsilçiləri də çıxış etmişlər.
Benilüks Azərbaycanlıları Gənclərinin Əlaqələndirmə Şurasının sədri Musa Pünhan və İraq Türkmənləri Məclisinin rəhbəri Güneyt Avcu bu ölkədəki Azərbaycan diasporunun fəaliyyətindən danışmış, belə tədbirlərin xaricdə yaşayan azərbaycanlılar üçün vacibliyini vurğulamışlar.
Konfransın rəsmi hissəsindən sonra toplantı iştirakçıları üçün ziyafət təşkil olunmuş, Azərbaycanın incəsənət ustaları xalq mahnılarını ifa etmişlər.