Beyləqanda ağacəkmə aksiyası keçirilmişdir
Beyləqan, 21 noyabr (AZƏRTAC). Beyləqan rayonunda ağacəkmə aksiyası keçirilmişdir.
Rayon icra hakimiyyətindən AZƏRTAC-a bildirmişlər ki, əmək kollektivlərinin nümayəndələri, sakinlər ekoloji mühitin sağlamlaşdırılması məqsədi ilə keçirilən tədbirdə fəal iştirak etmişlər. Aksiya zamanı Beyləqan-Daşburun magistral yolunun kənarına 3 min sərv ağacı əkilmişdir.
Xatırladaq ki, cari ildə keçirilən iməciliklər zamanı rayon ərazisində 40 mindən artıq ağac əkilmişdir. Bu dövrdə Heydər Əliyev Mərkəzinin, mərkəzi şəhər parkının, Mücirəddin Beyləqani xiyabanının ərazisində 4,5 min kvadratmetrdən çox ərazidə yaşıl çəmənliklər salınmış, dekorativ kollar əkilmişdir.
Bölmənin digər xəbərləri
