Beynəlxalq ictimaiyyət ermənilərin mina terroruna qarşı bu ölkəyə təzyiq göstərməlidir - Açıqlama
Bakı, 5 avqust, AZƏRTAC
Azərbaycanda fəaliyyət göstərən bir sıra qeyri-hökumət təşkilatlarının rəhbərləri humanitar minatəmizləmənin sülhün bərqərar olması prosesindəki potensialından istifadəyə çağırışla əlaqədar beynəlxalq ictimaiyyətə müraciət ünvanlayıblar.
Mövzunu AZƏRTAC-a şərh edən Dövlət Miqrasiya Xidməti (DMX) yanında İctimai Şuranın sədri, sosial fəlsəfə üzrə fəlsəfə doktoru Azər Allahverənov vurğulayıb ki, 44 günlük Vətən müharibəsindən sonra mina terroru Azərbaycan üçün kifayət qədər aktual məsələdir. Statistik rəqəmlərə görə, Azərbaycan dünyada mina terrorundan əziyyət çəkən dövlətlər arasında ilk sıralardadır. Hazırda Azərbaycan öz resursları hesabına mina terroru ilə mübarizə aparır və işğaldan azad olunmuş ərazilərdə minalar da daxil olmaqla partladılmayan hərbi sursatların təmizləmə işləri davam edir. Lakin nəzərə almaq lazımdır ki, Vyetnam, Ukrayna kimi müharibədən əziyyət çəkən bir sıra ölkələrdə hətta 60 il bundan əvvəl basdırılan minalar bu gün də böyük təhlükə yaradır. BMT, Avropa İttifaqı və minatəmizləmə üzrə ixtisaslaşmış təşkilatlar bu prosesdə Ukraynanın yanındadır. Onlar Ukraynanın hərbi əməliyyatlar aparılmayan bölgələrində bu problemdən tez zamanda xilas olması üçün zəruri texniki dəstəyi göstərirlər. Lakin Azərbaycana minaların təmizlənmə istiqamətində beynəlxalq səviyyədə dəstək göstərilmir. Vətən müharibəsindən sonra Azərbaycanın işğaldan azad edilmiş ərazilərində bir milyondan çox mina basdırılıb. Hətta müharibədən sonra, Laçın yolunun açıq olduğu müddətdə separatçılar havadarlarının fəal dəstəyi nəticəsində Azərbaycan ərazisinə minalar daşıyıb. Minaların aşkarlanması əməliyyatları zamanı Daşkəsən rayonunun bəzi ərazilərində də minaların basdırıldığı müəyyən olunub və onlar olduqca sıx yerləşdirilib. Maraqlısı budur ki, aşkarlanan minaların müəyyən hissəsi məhz 2021-ci ildə istehsal olunub. Yəni 44 günlük savaşdan sonra Ermənistanın Azərbaycana qarşı mina terroru davam edib. Terroru davam etdirməkdə məqsəd işğaldan azad olunmuş bölgələrə oradan qovulmuş məcburi köçkünlərin qayıtmasını əngəlləmək, zəruri infrastruktur layihələrin həyata keçirilməsinin qarşısını almaqdır.
“Müharibədən sonra 300-dən çox azərbaycanlı mina terrorunun qurbanı olub. Onlardan 55 nəfəri dünyasını dəyişib. Ərazilərin mina ilə çirklənməsi yalnız Azərbaycan xalqının deyil, bütün Cənubi Qafqazın faciəsidir. Basdırılan minalar nəticəsində yaralanan və həlak olanların əksəriyyəti mülki şəxslərdir. Azərbaycanın öz hesabına apardığı genişmiqyaslı minatəmizləmə əməliyyatları ilə ölkə əhalisinin, eyni zamanda, oraya gedən xarici vətəndaşların təhlükəsizliyini təmin edir”, - deyə İctimai Şuranın sədri bildirib.
O qeyd edib ki, Türkiyə, Pakistan, Britaniya kimi bəzi ölkələr bu və ya digər formada Azərbaycana dəstək verir. Ümumiyyətlə, beynəlxalq səviyyədə kütləvi qırğına səbəb olacaq minanın istifadə edilməsi qadağan olunub. Lakin Rusiyanın sülhməramlı qüvvələri kontingentinin yerləşdiyi ərazidəki qeyri-qanuni erməni hərbi birləşmələri tərəfindən aparılan beynəlxalq hüququn müvafiq tələblərinə zidd fəaliyyət növü hələ də davam edir.
“QHT-lərin beynəlxalq ictimaiyyətə müraciətinin əsas məqsədi həmin qurumların minatəmizləmə istiqamətində Azərbaycana yaxından dəstək olmasının təmin edilməsidir. Hazırda Ermənistanda mina istehsal edən zavod fəaliyyət göstərir. Həmin zavod üzərində hər hansı beynəlxalq nəzarət yoxdur. Burada əsasən piyada əleyhinə minalar istehsal edilir. QHT-lərin müraciətlərində Ermənistanın yaxın qonşularına qarşı həyata keçirdiyi bu cinayətkar fəaliyyətin qarşısının alınması üçün beynəlxalq ictimaiyyət tərəfindən həmin ölkəyə zəruri təzyiqin göstərilməsinin vacibliyi vurğulanıb. Hesab edirəm ki, bu, bölgədə dayanıqlı sülhün və təhlükəsizliyin təmin olunmasına xidmət edən çağırışdır”, - deyə Azər Allahverənov vurğulayıb.
Bölmənin digər xəbərləri
