Beynəlxalq müşahidəçilər Rusiyada prezident seçkilərini şəffaf və ədalətli adlandırıb
Moskva, 18 mart, AZƏRTAC
Beynəlxalq müşahidəçilər Rusiyada keçirilən prezident seçkilərini şəffaf və ədalətli adlandırıblar.
AZƏRTAC xəbər verir ki, MDB Baş katibinin müavini İlxom Nematov seçkilərdə beynəlxalq müşahidəçilərin fəaliyyətinin yekununa dair keçirilən mətbuat konfransında Birlik ölkələri müşahidə missiyasının rəyini ifadə edib. O qeyd edib ki, Rusiyada prezident seçkiləri Konstitusiyanın və seçki qanunvericiliyinin tələblərinə uyğun keçirilib.
Nematov vurğulayıb ki, monitorinq əsnasında seçkilərin nəticələrinə təsir edə biləcək hər hansı qanun pozuntusu aşkar olunmayıb.
MDB Parlamentlərarası Assambleyasının müşahidəçi qrupunun əlaqələndiricisi, belaruslu senator Mixail Rusı isə məlumat verib ki, monitorinq iştirakçıları Rusiyanın 15 regionunda, habelə 9 MDB ölkəsi və digər dövlətlərdə 215 seçki məntəqəsində olublar.
Rusiyada prezident seçkilərini 129 ölkədən 1115 beynəlxalq müşahidəçi izləyib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
