Birləşmiş Ərəb Əmirliklərinin Dubay Əmirliyinin məscidlərində 20 Yanvar şəhidlərinin ruhuna dualar oxunacaqdır
Bakı, 19 yanvar (AZƏRTAC). Yanvarın 21-də Birləşmiş Ərəb Əmirliklərinin (BƏƏ) Dubay Əmirliyinin məscidlərində cümə namazı zamanı 20 Yanvar şəhidlərinin ruhuna dualar oxunacaqdır.
Diasporla İş üzrə Dövlət Komitəsindən AZƏRTAC-a bildirmişlər ki, mərasim Dubaydakı “Azərbaycan” Cəmiyyətinin sədri Samir İmanovun “AUGAF” dini məsələlər üzrə idarəyə yazlı müraciətinə əsasən həyata keçiriləcəkdir.
Eyni zamanda, 20 Yanvar faciəsinin 21-ci ildönümü ilə bağlı BƏƏ-də yaşayan soydaşlarımız tərəfindən şəhidlərimizin xatirəsini anma tədbiri keçirilmişdir. Mərasimə azərbaycanlılarla yanaşı, türk icmasının təmsilçiləri, İraq türkmənləri, yerli ərəblər və digər xalqların nümayəndələri qatılmışlar.
Samir İmanov qeyd etmişdir ki, 1990-cı il yanvarın 19-dan 20-nə keçən gecə xalqımız tarixin ağır və sərt sınaqlarından mərdliklə çıxaraq, mübariz və qəhrəman xalq olduğunu bir daha dünyaya sübut etmişdir.
Cəmiyyət sədri əlavə etmişdir ki, faciədən dərhal sonra ulu öndər Heydər Əliyev Azərbaycanın Moskvadakı daimi nümayəndəliyinə gələrək xalqımızın haqq səsini dünyaya çatdırmış, təqsirkarların xalqımız qarşısında cavab verəcəyini bildirmişdir. Ümummilli liderin hakimiyyətə qayıdışından sonra 1994-cü il martın 29-da bu qanlı hadisəyə hüquqi-siyasi qiymət verilmişdir.
Tədbirdə 20 Yanvar faciəsinin dəhşətlərini əks etdirən fotosərgi nümayiş etdirilmiş, sənədli film göstərilmişdir.
İştirakçılara qanlı faciə ilə bağlı müxtəlif dillərdə hazırlanmış məlumat vərəqələri və Heydər Əliyev Fondunun hazırladığı “Qarabağ həqiqətləri” kitabı təqdim olunmuşdur.
Ölkənin “Al-Bayan” qəzetində 20 Yanvar faciəsi ilə bağlı “BƏƏ-dəki Azərbaycan diasporu Sovet İttifaqının Azərbaycanda törətdiyi qırğın zamanı şəhid olanların ildönümünü yad edir” sərlövhəli məqalə dərc olunmuşdur. Məqalədə qeyd edilmişdir ki, sovet hərbi birləşmələrinin Bakıya hücumu nəticəsində qadın və uşaqlar da daxil olmaqla 173 günahsız insan vəhşicəsinə qətlə yetirilmiş, 641 nəfər yaralanmış, yüzlərlə insan itkin düşmüş, 200 ev dağıdılmışdır. Müəllif vurğulamışdır ki, hər il yanvarın 20-də Azərbaycan xalqı şəhid olmuş oğul və qızlarının xatirəsini ehtiramla yad edir, matəm saxlayır.
Qeyd edək ki, cəmiyyətin sədri S.İmanov 20 Yanvar şəhidlərinin xatirəsinin anılması ilə bağlı BƏƏ-nin parlamentinin sədrinə, Dubay Şeyxinin Aparatının rəhbərinə, İnsan Hüquqları İnstitutuna ətraflı məlumat göndərmişdir. Sədr, həmçinin BƏƏ-nin tanınmış media şirkətlər qrupundan birinin rəhbəri doktor Abdurrahman Al-Jaberi ilə də görüşərək “Qanlı yanvar” hadisələri barədə geniş məlumat vermişdir. A.Al-Jaberiyə ulu öndər Heydər Əliyevin həyat və fəaliyyətindən, Qarabağ həqiqətlərindən bəhs edən ərəb və ingilis dillərində kitablar təqdim olunmuşdur.
A.Al-Jaberi isə müəllifi olduğu və Azərbaycanla bağlı məlumatların da əksini tapdığı “İtirilməmiş xəzinə” kitabını cəmiyyətin rəhbərinə hədiyyə etmişdir. Müəllif yaxın vaxtlarda Azərbaycan Respublikası, Qarabağ münaqişəsi, 20 Yanvar və Xocalı faciələri kimi həqiqətlərlə bağlı ərəb dilində yeni kitab hazırlayacağını da bildirmişdir. O, bu məqsədlə Azərbaycana səfər etməyi planlaşdırdığını diqqətə çatdırmışdır.
######
Bölmənin digər xəbərləri
