SİYASƏT
BMTM-in baş məsləhətçisi: Azərbaycan BRICS-dən maksimum faydalanmalıdır
Bakı, 8 aprel, AZƏRTAC
Bu gün BRICS+ ölkələrinin qlobal ÜDM-dəki payı 37,3 faiz təşkil edir. 2040-cı ilə qədər bu rəqəmin 45 faizə çatacağı gözlənilir. BRICS qrupuna üzv ölkələrin ümumilikdə 3,5 milyard əhalisi var və ya dünya sakinlərinin 45 faizi bu quruma üzv ölkələrin payına düşür. Həmçinin qlobal iqtisadiyyatın 28 faizi BRICS-in payına düşür. Azərbaycan bu qədər böyük iqtisadi potensialı olan platforma ilə yaxından əməkdaşlıq etməli və ondan maksimum faydalanmalıdır.
AZƏRTAC xəbər verir ki, bu fikirləri BMTM-in baş məsləhətçisi Şahmar Hacıyev aprelin 8-də Beynəlxalq Münasibətlərin Təhlili Mərkəzində (BMTM) “Azərbaycan və BRICS: imkanlar və perspektivlər” mövzusunda keçirilən tədbirdə səsləndirib.
O, həmçinin BRICS-in Cənubi Qafqaz regionu üçün əhəmiyyətindən bəhs edib. Bildirib ki, regionun iki böyük dövləti olan İran və Rusiya da bu təşkilata üzvdür.
Qeyd edək ki, 2006-cı ildə Braziliya, Rusiya, Hindistan və Çin tərəfindən yaradılmış BRICS həmin tarixdən etibarən sərhədlərini genişləndirib. 2011-ci ildə Cənubi Afrika Respublikası, 2024-cü ildə isə İran, Səudiyyə Ərəbistanı, Birləşmiş Ərəb Əmirlikləri (BƏƏ), Misir və Efiopiya BRICS-ə qoşulub. Hazırda BRICS sürətlə inkişaf etməkdə olan ölkələr üçün məşvərət platforması rolunu oynayır.