BMU-da Beynəlxalq Tələbələr Klubu yaradılıb
Bakı, 9 aprel, AZƏRTAC
Bakı Mühəndislik Universitetində (BMU) Beynəlxalq Tələbələr Klubu təsis olunub.
BMU-dan AZƏRTAC-a bildirilib ki, bu məqsədlə keçirilən tədbirdə çıxış edən rektor Yaqub Piriyev son illər universitetdə təhsil alan əcnəbi tələbələrin sayı və coğrafiyasının nəzərəçarpacaq dərəcədə genişləndiyini vurğulayıb: “Hazırda BMU-da 40 ölkədən tələbələr təhsil alır ki, bu da əvvəlki illərlə müqayisədə təmsil olunan dövlətlərin, habelə tələbə sayının təxminən iki dəfədən çox artdığını göstərir. Bu dinamika universitetin qlobal təhsil məkanına inteqrasiyasının və beynəlxalq mühitdə artan nüfuzunun göstəricisi olmaqla yanaşı, əcnəbi tələbələrin akademik, sosial inteqrasiyasını daha sistemli şəkildə təmin edəcək institusional mexanizmlərin yaradılmasını zərurətə çevirir”.
Hazırda BMU-da ümumilikdə 20-dən artıq tələbə klubunun fəaliyyət göstərdiyini, onların sırasına əcnəbi tələbələrdən ibarət yeni klubun qoşulmasının təqdirəlayiq hal olduğunu deyən Yaqub Piriyev, eyni zamanda, bu addımın multikulturalizm prinsiplərinin ali təhsil mühitində təşviqi baxımından önəminə diqqət çəkib. Qeyd edib ki, müxtəlif mədəni və sosial mühitlərdən olan xarici tələbələrin belə bir platformada birləşməsi dialoqun, tolerantlığın formalaşmasına, fərqli dəyərlərin qarşılıqlı zənginləşməsinə mühüm töhfə verəcək. Yeni sosial layihələrin, ideyaların həyata keçirilməsində klub üzvlərini fəal olmağa çağıran, onlara fəaliyyətlərində uğurlar arzulayan rektor bildirib ki, görülən işlər nəticə etibarilə tələbələrin liderlik və kommunikasiya bacarıqlarının inkişafına da müsbət təsir göstərəcək.
Klubun sədri seçilən sənaye mühəndisliyi ixtisasının Keniyadan olan tələbəsi Peter Malale gələcək fəaliyyətlə bağlı məlumatları nəzərə çatdırıb. Qeyd olunub ki, klubun fəaliyyət çərçivəsinə tələbəyönümlü tədbirlərin, o cümlədən akademik seminarlar, mədəniyyət günləri, inteqrasiya proqramları və müxtəlif sosial layihələrin həyata keçirilməsi daxildir. Göstərilən etimada görə təşəkkürünü dilə gətirən Peter Malale tələbələrin öz potensiallarını reallaşdırmaq üçün yaradılan şəraitə görə universitet rəhbərliyinə təşəkkürünü bildirib.
Sonra tədbirdə çıxış edən əcnəbi tələbələr müxtəlif təkliflər irəli sürüblər. Bildiriblər ki, Beynəlxalq Tələbələr Klubu onların təşəbbüslərini reallaşdırmaq, özlərini təqdim etmək və universitet həyatına daha fəal qoşulmaq üçün geniş imkanlar açacaq.
Bölmənin digər xəbərləri
