Bobur Usmanov: Azərbaycan-Özbəkistan münasibətlərinin hazırkı səviyyəsi nümunəvi xarakter daşıyır
Bakı, 14 iyun, AZƏRTAC
Azərbaycan-Özbəkistan münasibətlərinin hazırkı səviyyəsi nümunəvi, misli görünməmiş xarakter daşıyır. İki ölkənin prezidentlərinin bu işdə xidmətləri böyükdür.
AZƏRTAC xəbər verir ki, bu fikirləri bu gün Bakıda təşkil olunmuş dəyirmi masada Özbəkistan xarici işlər nazirinin müavini Bobur Usmanov deyib. Azərbaycan-Özbəkistan münasibətlərinə və Özbəkistan Respublikasının prezidenti postuna iyulun 9-na nəzərdə tutulan növbədənkənar seçkilərə həsr olunan tədbir Beynəlxalq Münasibətlərin Təhlili Mərkəzində (BMTM) keçirilib.
“Bizim münasibətlər qardaş ölkələrin necə dostluq etməsinə nümunədir. Biz ticarət dövriyyəsinin yüksək həddini müəyyən edəcəyik və fikrimizcə bu, əldə edilə biləndir”, - deyən Özbəkistan XİN başçısının müavini əlavə ki, ixrac-idxal əməliyyatlarının illik həcmini bir milyard dollara çatdırmaq planlaşdırılır.
BMTM-nin İdarə Heyətinin sədri Fərid Şəfiyev, öz növbəsində qeyd edib ki, Azərbaycanın Mərkəzi Asiya ölkələri, xüsusilə də Özbəkistan ilə əməkdaşlığı prioritet xarakter daşıyır. Onun sözlərinə görə, Azərbaycan Prezidenti İlham Əliyevin ötən il üç dəfə Özbəkistana səfər etməsi faktını vurğulamaq kifayətdir.
Ermənistan-Azərbaycan münaqişəsinin ədalətli şəkildə nizamlanması işində Özbəkistanın göstərdiyi güclü dəstəyə diqqət çəkən F.Şəfiyev əlavə edib ki, bu dəstək indi - münaqişədən sonrakı mərhələdə də davam edir. Bununla bağlı o xatırladıb ki, Özbəkistan işğaldan azad olunmuş Füzulidə məktəb tikintisini maliyyələşdirir.
Bölmənin digər xəbərləri
