Bölgələrdə Məhsul festivallarına start verilir
Bakı, 20 iyun, AZƏRTAC
Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə ölkənin müxtəlif regionlarında Məhsul festivallarına start verilir. İlk dəfə vahid konsepsiya əsasında keçiriləcək bu festivallar 9 iqtisadi rayonu əhatə etməklə, 2025-ci ilin iyun-noyabr ayları ərzində 13 rayonda təşkil olunacaq.
AZƏRTAC xəbər verir ki, bunu festivallarla bağlı təşkil edilən mətbuat konfransında mərkəzin direktoru Anar Cəfərov bildirib.
Onun sözlərinə görə, festivalların keçirilməsində əsas məqsəd ölkənin regionlarının aqroturizm potensialının artırılması, yerli kənd təsərrüfatı məhsullarının tanıdılması, fermer və istehsalçıların dəstəklənməsi, məhsullarına ictimai marağın və ixrac imkanlarının genişləndirilməsidir: “Eyni zamanda, bu tədbirlər kənd əhalisinin sosial rifahının yaxşılaşdırılması və bölgələrdə milli-mədəni irsin qorunub yaşadılmasına da töhfə verəcək. Hər festival çərçivəsində bölgəyə məxsus folklor nümunələri, yerli sənətçilərin çıxışları və fermer təsərrüfatlarının məhsulları təqdim olunacaq. Bu da regionların aqrar potensialının və mədəni ənənələrinin geniş auditoriyaya çatdırılmasına şərait yaradacaq”.
Anar Cəfərov deyib ki, son bir ildə Azərbaycanda keçirilmiş Aqrar Biznes Festivallarında ümumi dəyəri təxminən 8 milyon manat olan məhsul satılıb: “Müxtəlif bölgələrlə təşkil olunmuş bu festivalların əsas məqsədi kənd təsərrüfatı məhsullarının istehsalçılarını və onların potensial müştərilərini bir araya gətirmək, əməkdaşlıq imkanları yaratmaqdır. Bu proses artıq praktik nəticə verib, özünü doğruldub. Bütün ölkə üzrə, o cümlədən 14 iqtisadi rayonun hər birində - ümumilikdə 66 Aqrar Biznes Festivalı təşkil edilib. Burada həm kənd təsərrüfatı məhsulları, həm də onların emalı ilə bağlı avadanlıqların satışı həyata keçirilib".
Mərkəzin direktoru vurğulayıb ki, Məhsul festivalları Aqrar Biznes festivalları ilə paralel olaraq keçiriləcək və ölkənin müxtəlif regionlarının kənd təsərrüfatı məhsullarını geniş ictimaiyyətə tanıtmaq məqsədi daşıyır: “Cari ildə Samuxda “II Ərik”, Şəmkirdə “Tərəvəz”, Daşkəsəndə “Kəndli və Fermer”, Kürdəmirdə “Bostan”, Xaçmazda “Şaftalı”, Göygöldə “II Moruq”, Şamaxıda “Üzüm və Şərab”, Masallıda “Çəltik”, Neftçalada “Balıq”, Saatlıda “Pambıq”, Ağstafada “Yerfındığı”, Balakəndə “V Xurma” və Ağdaşda “Heyva” festivalları keçiriləcək. Dövlət-özəl tərəfdaşlığı prinsipi ilə təşkil olunan festivallarda Kənd Təsərrüfatı Nazirliyinin tabeli qurumları, digər dövlət strukturları, sahibkarlar, bank və kredit təşkilatları, supermarket şəbəkələri və “Aqrar Tədarük və Təchizat” ASC kimi qurumlar fəal iştirak edəcək. Bu isə fermerlərlə təchizatçılar arasında əlaqələrin qurulmasına, yeni texnologiyaların tətbiqinə, məhsul satışının genişlənməsinə və ümumilikdə aqrar sektorun dinamik inkişafına zəmin yaradır. Məhsul festivalları çərçivəsində kənd təsərrüfatının prioritet istiqamətlərinə dair məlumat sessiyaları və “Meyvə-tərəvəz məhsullarının uzun müddətli saxlanılması və soyuq zəncirin tətbiqi” mövzusunda təlimlər də keçiriləcək. İyulun 3-də Şəmkirdə baş tutacaq “Tərəvəz” festivalında sərgi hissəsi ilə yanaşı, istixana sahibləri və fermer təsərrüfatlarının dəstəyi ilə festival ziyarətçiləri üçün piknik zonası yaradılacaq. Burada şəhər sakinləri və qonaqlar üçün xüsusi ayrılmış ərazilər olacaq, piknik mədəniyyəti təbliğ ediləcək və istifadə olunan bütün ərzaq məhsulları məhz həmin bölgənin fermerlərinin təqdim etdiyi yerli məhsullardan ibarət olacaq. Festivallar həm fermerlərin məhsullarını bazara çıxarması və satışından gəlir əldə etməsi, həm də onların zəhmətinin nəticəsini qeyd etməsi üçün bayram atmosferi yaratmaq məqsədi daşıyır. Tədbirlər zamanı bölgəyə məxsus folklor nümunələri, yerli sənətçilərin çıxışları və il ərzində rayonda görülən işlərin təqdimatı da keçiriləcək. Fermerlərin istirahəti və mədəniyyətə cəlb olunması festivalın digər mühüm tərəflərindən biridir”.
Tədbirdə "Caspian Event Organizers" MMC-nin nümayəndəsi Bəhruz Hidayətzadə bildirib ki, gələn il mayın 5-8-də Bakı Ekspo Mərkəzində keçiriləcək “Caspian Agro 2026” sərgisi təkcə məhsul və texnologiyaların nümayişi ilə kifayətlənməyəcək, həm də Məhsul festivalları çərçivəsində toplanan ənənəvi dəyərləri, regionların aqrar və mədəni potensialını, ölkənin kənd təsərrüfatı sektorunun müasir imkanlarını beynəlxalq auditoriyaya təqdim edəcək. Sərgi iştirakçıları və ziyarətçilər ölkənin müxtəlif bölgələrinin nə ilə tanındığını öyrənmək, Azərbaycanın zəngin milli mətbəxi və aqrar sahədəki rəngarəngliyi ilə tanış olmaq imkanı qazanacaqlar”.
Meyvə-Tərəvəz İstehsalçıları və İxracatçıları Assosiasiyasının sədr müavini Jalə Əmirbəyova Məhsul festivallarında təqdim olunacaq məhsulların qiymət məsələsinə də aydınlıq gətirib. “İqlim və digər amillər kənd təsərrüfatı məhsullarının qiymətinə təsir göstərir. Məhsul bol olanda qiymət aşağı düşür. Bəzi məhsullar var ki, onların qiymətini dövlət tənzimləyir. Çünki bunlar strateji məhsullardır. Dövlət çalışır ki, bu məhsulların qiyməti sabit qalsın və əhali üçün əlçatan olsun. Məsələn, buğdanı buna misal göstərə bilərik. Digər məhsullarda isə belə bir tənzimləmə yoxdur. Biz çalışırıq ki, çox məhsul əldə edək. Alıcı da istəyir ki, qiymət aşağı olsun. Çalışırıq ki, belə tədbirlər zamanı istehsalçılar məhsullarını sərfəli qiymətə sata bilsinlər", - deyə o bildirib.
Bölmənin digər xəbərləri
