Bolqarıstanda hökuməti formalaşdırmaq mandatı sosialistlərə verilib
Bakı, 16 yanvar, AZƏRTAC
Bolqarıstan Prezidenti Rumen Radev bazar ertəsi günü Bolqarıstan Sosialist Partiyasının (BSP) nümayəndələrinə hökuməti formalaşdırmaq üçün mandat verib.
AZƏRTAC xəbər verir ki, bu barədə Bolqarıstan milli radiosu məlumat yayıb.
“Hökumətin qurulması üçün birinci və ikinci mandatların uğursuz olduğunu nəzərə alaraq, baş nazir vəzifəsinə namizəd irəli sürməyi sizə həvalə edirəm”, - Prezident mandatı BSP lideri Korneliya Ninovaya təqdim edərkən belə deyib.
Radio bildirir ki, Rumen Radev parlamentdəki beş fraksiyadan sosialistləri seçib. BSP-nin Bolqarıstan Milli Assambleyasının (parlamentinin) hazırkı tərkibi dövründə hökuməti qurmaq üçün son imkanı var. Əgər sosialistlər hökuməti formalaşdıra bilməsələr, ölkədə yenidən növbədənkənar parlament seçkiləri keçiriləcək.
Bölmənin digər xəbərləri
