BQXK baş verən hadisələrə ermənipərəst mövqedən yanaşır – Şərh
Bakı, 3 avqust, AZƏRTAC
Azərbaycanın vətəndaş cəmiyyəti təmsilçiləri Beynəlxalq Qırmızı Xaç Komitəsinə (BQXK) Qarabağdakı qərəzli fəaliyyətləri ilə bağlı açıq məktubla müraciət ediblər.
Mövzunu AZƏRTAC-a şərh edən Dövlət Miqrasiya Xidməti (DMX) yanında İctimai Şuranın sədri, sosial fəlsəfə üzrə fəlsəfə doktoru Azər Allahverənov vurğulayıb ki, QHT-lər məktubda Komitənin Qarabağdakı təmsilçilərinin yaratdıqları vəziyyətdən narahat olduqlarını ifadə ediblər. A.Allahverənov Komitənin özünü müstəqil təşkilat hesab etdiyini və tərəflər arasındakı qərəzli münasibətlərdə neytrallığını bir növ bəyan edən humanitar təşkilat olduğunu deyib: “Vətəndaş cəmiyyəti təmsilçiləri tərəfindən BQXK-nin prezidenti xanım Mirjana Spoljariç Eqqerə ünvanlanan məktub onların narahatlıq və mövcud vəziyyətlə bağlı narazılıqlarının açıq nümunəsidir. Müraciətdə vurğulandığı kimi Komitə 30 ildən çoxdur ki, Azərbaycanda fəaliyyət göstərir. Həmin müddət ərzində Komitənin fəaliyyətində müəyyən problemlər yaranıb. Bu problemlərlə bağlı yaranan suallar indiyədək BQXK tərəfindən dolğun şəkildə cavablandırılmayıb. Onlar suallara mövzudan kənar cavabları özündə əks etdirən bəyanatları, press-relizlər ilə insanları aldatmağa çalışıblar. Birinci Qarabağ müharibəsində olduğu kimi hazırda həmin suallar yenidən aktualdır”.
İctimai Şuranın sədri Komitənin məqsəd və vəzifələrinin də humanitar mahiyyət daşımalı olduğunu deyib: “Həmin humanitar mahiyyətə hərbi münaqişələrdən əziyyət çəkən insanların həyatlarını, onların ləyaqətlərini qorumaq, müxtəlif zorakılıq vəziyyətində yaşayan şəxslərə zəruri dəstəyin göstərilməsi kimi məsələlər daxildir. Təəssüf ki, qeyd olunan məqsədlərdən heç biri Komitənin gördükləri işlərdə hiss olunmur. Bir ildən çoxdur ki, Rusiya-Ukrayna arasında gedən müharibə davam edir və BQXK hərbi əməliyyatların getdiyi ərazidədir və Komitənin nizamnaməsinə uyğun davranır. Hər hansı lokal şəkildə müəyyən narazılıqlar həllini tapır. Lakin Azərbaycanla bağlı məsələlər gündəmə gəldikdə biz görürük ki, təşkilatın fəaliyyəti olduqca qərəzlidir. BQXK ölkəmizlə bağlı bütün məsələlərə konfedisiallıq statusu verir və hər hansı formada ört-basdır edir”.
A.Allahverənov hazırda baş verən problemlərin 2000-ci ildə həmin komitənin Xankəndi ofisinin açılışı ilə bənzər olduğunu diqqətə çatdırıb: “Açılışdan dərhal sonra məlum oldu ki, BQXK-nin Xankəndindəki ofisi birbaşa Komitənin İrəvandakı ofisinə tabedir. Həmin proses Azərbaycanın suverenliyinə, ərazi bütövlüyünə zidd olan hərəkətdir. Hazırda isə “Humanitar yardım” adı altında BQXK-nin əməkdaşları Laçın yolu üzərindən qaçaqmalçılıqla məşğul olurlar. Aşkarlanan faktlar qadağan olunmuş əşyalar, ləvazimatların daşınmasıdır. Deklarasiya edilmədən, bəyan olunmadan müəyyən malların daşınması olarsa, bu açıq-aşkar qaçaqmalçılıqdır. Digər tərəfdən BQXK-yə məxsus avtomobillər bəzən Xankəndində qeydiyyatı olmayan erməniləri və ya xarici ölkə vətəndaşlarını daşıyırlar. Onlar bütün sərhədlərin və yolların bağlı olduğunu deyir. Lakin Xankəndidə keçirilən mitinqlərdə, nümayişlərdə başqa ölkə vətəndaşlarının iştirakı görünür. Bu zaman sual ortaya çıxır ki, həmin şəxslər hansı yollarla ora daxil olublar?! BQXK-nin nəqliyyat vasitələri ilə nəinki qaçaqmalçılıq edilir, hətta bəzi şəxslər bölgəyə daşınır”.
İctimai Şuranın sədri Komitənin məsələlərə ermənipərəst mövqedən yanaşdığını bildirib: “BQXK-nin əməkdaşlarının əksəriyyəti erməni millətindən olan şəxslərdir və proseslərdə kifayət qədər fəallıq göstərirlər. Azərbaycan taleyi məlum olmayan 4 min vətəndaşı ilə bağlı müxtəlif platformalara, eyni zamanda, Komitəyə müraciət edib. Lakin təəssüflər olsun ki, təşkilat məlum olan 54 nəfərdən sadəcə 17-ni Azərbaycana təhvil verib. Geridə qalan 37 nəfərlə bağlı isə hər hansı informasiya təqdim etməyib. Sonradan tapılan sənədlər, məktublar zamanı BQXK-nin həmin 37 nəfərlə əlaqəsinin olduğu aşkarlanıb. Tapılan məktubların müəyyən zamanlarda təşkilata göndərildiyi məlum olub. Buradan belə nəticə çıxır ki, Komitə həmin şəxslərin sağ olduğunu bilib, lakin Azərbaycan tərəfinə məsələ ilə bağlı açıqlama verməyib. Beynəlxalq Qırmızı Xaç Komitəsinin fəaliyyətsizliyi nəticəsində həmin şəxslər işgəncələrə məruz qalaraq qətlə yetirilib”.
A.Allahverənov Komitənin Azərbaycandakı fəaliyyətinin ciddi şəkildə sorğulanmasının, Xankəndində fəaliyyət göstərən ofisin birbaşa Bakıya tabe olmasının vacibliyini də vurğulayıb. O əlavə edib ki, Beynəlxalq Qırmızı Xaç Komitəsi bu məsələ ilə bağlı çox ciddi izahat verməlidir.
Bölmənin digər xəbərləri
