Britaniya Kralı İdris Elba ilə “Netflix”in sənədli filmi layihəsi üzərində işləyib
Bakı, 21 iyun, AZƏRTAC
Böyük Britaniya Kralı III Çarlz və İdris Elba “Netflix” üçün sənədli film layihəsinin yaradılmasında əməkdaşlıq ediblər.
Film 1976-cı ildə Kral Çarlz tərəfindən həssas təbəqədən olan gənclərə kömək etmək üçün əsası qoyulmuş “ The Royal Trust” adlı Britaniya xeyriyyə təşkilatından bəhs edir. Məlumdur ki, Elba gənc artist kimi həmin fonddan sənətin inkişafı üçün qrant alıb və bu, ona aktyorluq təhsili almağa imkan verib.
Gələn həftə çəkilişlərinə başlanacaq və 2026-cı ilin payızında “Netflix”də yayımlanacaq sənədli filmdə prodüser qismində İdris Elba və Dyen Petterle tərəfindən qurulan “22 Summers” kompaniyası çıxış edəcək. Ekran əsərinin rejissoru isə Eşli Frensis-Roy olacaq.
Dyen Petterle ilə yanaşı, filmin icraçı prodüserləri Conatan Smit və Yeva Omaqomidir. Şou rəhbəri vəzifəsini isə Kler Bredberi yerinə yetirəcək.
İdris Elba deyib: “The Royal Trust” mənə həyatımı dəyişən bir fürsət verdi. Ambisiyalarımı həyata keçirmək üçün vasitələrim olmadığı bir vaxtda onlar mənə karyeramı inkişaf etdirmək istiqamətində ilk addımları atmağa kömək edən real və praktiki dəstək, o cümlədən maliyyə yardımı təklif etdilər. Bu gün Elba Ümid Fondu vasitəsilə mən potensialı olan, lakin real imkanı olmayan gənclər üçün eyni imkanları yaratmağa diqqət yetirirəm. Dünyada milyonlarla insan hələ də bu qapının açılmasını gözləyir. Bu sənədli film nələrin mümkün olduğuna işıq salır və “The Royal Trust” fondunun fəaliyyətinin niyə bu qədər vacib olduğunu vurğulayır”.
Bölmənin digər xəbərləri
