BŞ SEÇİCİLƏRİ GÖRÜNMƏMİŞ FƏALLIQ NÜMAYİŞ ETDİRMİŞLƏR
İlk saatlardan burada yüksək seçici fəallığı hiss olunurdu. Səsvermə hüququ olanlar məntəqə komissiyasına yaxınlaşıb sürücülük vəsiqəsini və ya poçtla aldıqları qeydiyyat kartını təqdim edirdilər. Məntəqə üzvlərinin icazəsindən sonra isə elektron cihazın arxasına keçirdilər.
Ekrana toxunma ilə səsvermə bu məntəqələrdə artıq 2-ci ildir ki, təcrübədən keçirilir. Builki prezident seçkilərində 29 ştat və Kolumbiya dairəsi belə cihazlardan istifadə etmişdir. Bu cür səsvermə həm rahat, həm də qüsursuzdur. Məntəqə günün sonunda bağlandıqdan sonra cihaz səsvermənin nəticələrini çap edir.
İstifadə qaydaları ilə bağlı çətinlik çəkənlər məntəqə üzvlərini köməyə çağırırdılar. Lakin onlara izahat ekranın qarşısında deyil, kiçik divarın əks tərəfindən verilirdi. Məntəqə üzvləri çalışırdılar ki, heç bir şey seçici rəyinə təsir etməsin.
Bəzi seçki məntəqələrinin qarşısında növbələr səhər saat beşin yarısından yaranmağa başlamışdı. Arlinqton dairəsinin Avrora Hill məntəqəsinin sədri Kərol Delonq deyirdi ki, hərdən çölə çıxıb, seçicilərdən təmkinli olmağı xahiş edirdik. Qeydiyyatda olan seçicilərin 85-90 faizi səs vermişdir.
Görünür, seçkiqabağı sorğular özünü doğrultdu. Adətən, 50 faiz seçici iştirakı qeydə alınan ABŞ-da bu dəfə ölkə üzrə 60 faiz səsvermə göstəricisi gözləyirdilər. Təhlilçilər bildirirdi ki, əhali 2004-cü ilin prezident seçkilərinə təkcə demokratik proses kimi deyil, taleyüklü məsələ kimi baxır.
Virciniya ştatının dairələrində əhali yalnız prezident və vitse-prezident seçmirdi. Bülletendə Konqresin Nümayəndələr palatasına və yerli məktəbələr şurasına yeni üzvlərin namizədliklərinə, həmçinin ştat konstitusiyasına əlavələrə münasibət bildirmək xahiş olunurdu. Lakin seçicilər etiraf edirdi ki, məsələlərin ən mühümü prezident seçimidir.
Virciniya demokratların təsiri güclü olan ştat sayılır. Buna baxmayraq, respublikaçılar 2004-cü ildə burada intensiv kampaniya aparıblar. Seçki məntəqələrində hər iki əsas partiyanın müşahidəçiləri var idi. Seçki prosesinin qayda-qanunla aparılmasını izləməklə yanaşı, səbirsizliklə məntəqənin bağlanması və səslərin hesablanmasını gözləyirdilər.
İlkin hesablamalara görə, Virciniya ştatındakı seçkilərdə Corc Buş qalib gəlmişdir. Ölkə üzrə seçkilərin nəticələrinin hesablanması isə bir-iki gün çəkə bilər. Noyabrın 2-də səs verən vətəndaşların səslərinin hesablanması ilə yanaşı, məntəqələr daimi yaşayış yerlərində olmayan seçicilərin poçtla göndərilən səslərini də hesablamalıdır.
Bölmənin digər xəbərləri
