BSU-da “İnklüziv bankçılıq” mövzusunda təlimin yekun görüşü təşkil edilib
Bakı, 4 fevral, AZƏRTAC
Fevralın 4-də Bakı Slavyan Universitetində (BSU) Bank Respublikanın əməkdaşlarına “İnklüziv bankçılıq” mövzusunda keçirilən peşəkar inkişaf təliminin yekun görüşü təşkil olunub. Tədbir çərçivəsində təlimin yekun nəticələri müzakirə edilib, aparılan sorğunun nəticələri təqdim olunub və iştirakçılara sertifikatlar təqdim edilib.
BSU-dan AZƏRTAC-a bildirilib ki, tədbirdə rektor Anar Nağıyev çıxış edərək bu layihənin ali təhsil müəssisəsi ilə bank sektoru arasında əməkdaşlığın uğurlu nümunəsi olduğunu vurğulayıb. Rektor bildirib ki, BSU inklüziv təhsil sahəsində ölkənin aparıcı ali təhsil müəssisələrindən biri kimi geniş təcrübəyə malikdir və bu istiqamətdə fəaliyyətini sistemli şəkildə davam etdirir. O, Azərbaycan Respublikasının Prezidenti İlham Əliyevin müvafiq sərəncamları ilə həyata keçirilən dövlət proqramları və Azərbaycanın Birinci vitse-prezidenti Mehriban Əliyevanın rəhbərliyi ilə təhsilin inkişafı və inklüzivliyin təşviqi istiqamətində görülən işləri xüsusi vurğulayıb.
A.Nağıyev bildirib ki, BSU 2022-ci ildən etibarən “İnklüziv təhsildən inklüziv cəmiyyətə” layihəsini həyata keçirir və layihənin əsas məqsədi cəmiyyətdə inklüziv dəyərlərin möhkəmlənməsində təhsilin rolunu gücləndirməkdir. Rektor qeyd edib ki, layihə çərçivəsində universitet ölkənin müxtəlif regionlarında yüzlərlə müəllim üçün təlimlər təşkil edir.
A.Nağıyev BSU-nun inklüziv təhsil sahəsində əldə etdiyi təcrübənin digər regional universitetlər tərəfindən də maraqla qarşılandığını və bir sıra ali təhsil müəssisələrinin universitetə müraciət edərək bu təcrübəni tətbiq etmək istədiyini diqqətə çatdırıb. O, BSU-nun müxtəlif ali təhsil müəssisələrində konfrans və seminarlarla çıxış edərək inklüziv təhsil modelini paylaşdığını bildirib.
Rektor təlim proqramının əsas məqsədinin bank sektorunda ilkin təmas nöqtələrində inklüziv xidmət mədəniyyətinin formalaşdırılması olduğunu vurğulayaraq qeyd edib ki, vətəndaşlara göstərilən xidmət zamanı münasibət və davranış forması onların cəmiyyətə inteqrasiyasına təsir edən əsas amillərdəndir. Bu baxımdan layihənin peşəkar inkişaf proqramı kimi mühüm əhəmiyyət daşıdığı bildirilib.
A.Nağıyev gələcəkdə Bank Respublika ilə əməkdaşlığın daha geniş miqyasda davam etdirilməsinin vacibliyini qeyd edib, bu istiqamətdə monitorinqlərin aparılması, qiymətləndirmə mexanizmlərinin tətbiqi və davamlı inkişaf mərhələlərinin həyata keçirilməsinin zəruriliyini vurğulayıb. O, BSU-nun əlavə təhsil proqramlarının, qısamüddətli təlim formatlarının və ikinci ali təhsil imkanlarının bank əməkdaşlarının peşəkar inkişafı üçün faydalı platforma ola biləcəyini bildirib.
Rektor çıxışında BSU-nun inklüziv təhsilin təşviqi sahəsində beynəlxalq şəbəkələrin üzvünə çevrildiyini, universitetin İtaliya, Finlandiya və Türkiyə də daxil olmaqla bir sıra ölkələrlə əməkdaşlıq əlaqələrinin mövcud olduğunu qeyd edib və bu platformaların Azərbaycanda inklüziv təhsilin inkişafına mühüm töhfə verdiyini vurğulayıb.
Sonda rektor Bank Respublika rəhbərliyinə və əməkdaşlarına inklüziv dəyərlərə göstərilən həssas münasibətə görə təşəkkürünü bildirib, XXI əsrin xidmətlər əsri olduğunu qeyd edərək bank sektorunun bu sahədə rolunun xüsusi əhəmiyyət daşıdığını vurğulayıb. O, əməkdaşlığın davamlı olacağına əminliyini ifadə edib.
Tədbirdə BSU-nun İnklüziv və adaptiv təhsil kafedrasının müdiri Arzu Məmmədova çıxış edərək təlimin əsas məqsədləri, proqramın məzmunu və əldə olunan nəticələr barədə ətraflı məlumat verib.
Daha sonra Bank Respublikanın İnsan resursları departamentinin təlim, inkişaf və daxili kommunikasiya istiqaməti üzrə direktor müavini Jalə Nəcəfova, Pərakəndə satışlar departamenti direktorunun vəzifəsini icra edən Aynurə Məmmədova çıxış edərək təlimin təşkilinə görə universitet rəhbərliyinə və təşkilatçılara təşəkkür edərək, inklüziv bankçılıq sahəsində bilik və bacarıqların artırılmasının əhəmiyyətini vurğulayaraq, bu istiqamətdə əməkdaşlığın gələcəkdə də davam etdirilməsinin vacibliyini qeyd edib.
Tədbirin sonunda təlim iştirakçıları proqramla bağlı təəssüratlarını bölüşüb, təlimin onların peşəkar inkişafına müsbət təsir göstərdiyini bildiriblər.
Sonda iştirakçılara sertifikatlar təqdim olunub.
Bölmənin digər xəbərləri
