Bu il Qəbələdə 152 min ədəd ağac əkilmişdir
Qəbələ, 26 dekabr (AZƏRTAC). “Ekologiya ili” çərçivəsində Qəbələ rayonunda həyata keçirilən ağac əkini kampaniyası uğurla davam etdirilir.
AZƏRTAC xəbər verir ki, rayon icra hakimiyyətinin təşkilatçılığı ilə dekabrın 24-də keçirilən növbəti yaşıllaşdırma tədbirləri zamanı 2000 ədəd ağac əkilmişdir. Ağac tingləri əsasən istifadəsiz qalmış boş torpaq sahələrinə, küçələrin kənarına, park və bağlara, sosial obyektlərin ətrafına əkilmişdir.
“Ekologiya ili” çərçivəsində Qəbələ rayonunda ümumilikdə 152 min ağac əkilmişdir. Hazırda 53 min hektara yaxın meşə ərazisi olan Qəbələdə bu sahənin mühafizəsi, yeni meşə sahələrinin, tarlaqoruyucu zolaqların salınması, qiymətli ağac tinglərinin yetişdirilməsi də diqqət mərkəzindədir. İlin əvvəlindən bu günədək rayonda dövlət meşə fondunun torpaqlarında 104 hektar əkin aparılmışdır. Bunun 25 hektarını palıd, 79 hektarını isə qoz, şabalıd, göyrüş, ağcaqayın, vələs ağacları təşkil edir.
Hazırda rayonun müvafiq təsərrüfatlarında 1,6 milyon ağac tingi yetişdirilir. Bu tinglərdən qarşıdakı aylarda yeni meşə zolağının və rayonda yaşıllıqların salınmasında istifadə olunacaqdır.
Bölmənin digər xəbərləri
