Bundan sonrasına ehtiyac qalmayacağı ümidi ilə...
Bakı, 17 iyun, AZƏRTAC
Ekologiya və Təbii Sərvətlər Nazirliyinin, yerli icra orqanlarının rəsmilərinin, əməkdaşlarının və könüllülərin iştirakı ilə növbəti genişmiqyaslı təmizlik aksiyaları ölkənin meşə ərazilərində, çay sahillərində və Xəzər dənizinin sahilboyu ərazilərində keçirilib.
Şabran, Şamaxı, Tovuz, Göygöl, Hacıkənd, Bərdə və respublikanın digər rayonlarının meşə ərazilərində, eləcə də Sumqayıt, Lənkəran şəhərləri, Neftçala və Xaçmaz rayonlarının Xəzər dənizi sahillərində keçirilən aksiyalar zamanı toplanmış plastik və digər tullantılar aidiyyəti üzrə daşınıb.
Bunu AZƏRTAC-a nazirliyin mətbuat katibi İradə İbrahimova deyib. O bildirib ki, aksiyaların keçirilməsində məqsəd sahilyanı ərazilərin təmizliyini təmin etmək, yay və istirahət mövsümü ilə əlaqədar meşə yanğınları riskinin artdığı dövrdə bu riski artıran şüşə, plastik və kağız tullantıları toplamaq, müəyyən olunmayan ərazilərə məişət tullantıları atılmasının qarşısını almaq, təbiət ərazilərində əhali tərəfindən təmizliyə riayət olunmasını təbliğ etmək və ictimaiyyəti ətraf mühitin mühafizəsi sahəsində mübarizəyə cəlb etməkdir.
“Hər kəsi təmizlik aksiyalarına qatılaraq fəallıq göstərməyə, təbiət ərazilərini, dəniz sahillərini, çay hövzələrini çirkləndirməməyə çağırıram”, deyən İradə İbrahimova bildirib ki, bu qəbildən təmizlik aksiyaları hər həftə keçirilir: "Respublikanın bütün bölgələrini əhatə edən bu aksiyalarda məqsədimiz vətəndaşlarımızı öz atdıqları tullantıları toplamağa təşviq etməkdir.
Təmizlik aksiyaları zamanı çay kənarlarından, dəniz sahilindən, təbiətdən nə qədər tullantı yığıldığı ilə bağlı sualı mətbuat katibi belə cavablandırıb: “Hər aksiya zamanı çox utandırıcı mənzərənin şahidi oluruq. Artıq təbiət turizmi mövsümü başlayıb. Ölkəmizə müxtəlif ölkələrdən qonaqlar gəlir. Utandırıcı mənzərələrlə, qarşılaşmamaq üçün tullantılara nəzarət edək, onları hara gəldi atmayaq, təbiəti çirkləndirməyək. Hər kəs tullantılarını toplasa, zibili hara gəldi atmasa bu utandırıcı mənzərə bir daha təkrarlanmaz.
Hər kəs özlüyündə, həm də düşüncə və davranışında olan "zibili hara gəldi atmaq" vərdişlərindən əl çəkməsə, təbiətdə ideal təmizliyə çatmaq mümkün olmayacaq”.
İrada İbrahimovanın sözlərinə görə, təmizlik aksiyaları hələ davam edəcək: “Növbəti şənbə yenə də meşə, çay və göl kənarlarında, dəniz sahillərində xoşagəlməz mənzərə yaradan zibillərin toplanmasına, növbəti təmizlik aksiyası keçirəcəyik. Növbəti dəfə də təmizləyəcəyik, ancaq ümid edirəm ki, bundan sonrasına, növbəti təmizlik aksiyalarına ehtiyac qalmayacaq.
Təbii ki, əgər hər kəs öz məsuliyyətini dərk etsə...".
Bölmənin digər xəbərləri
