Ceyran sürüsünün hərəkətləri barədə peyk vasitəsilə məlumatlar alınır
Bakı, 7 fevral (AZƏRTAC). 2010-cu il dekabrın 4-də Pirəkəşkül qəsəbəsi yaxınlığındakı Qobustan-Cəngiçay ərazisinə buraxılmış ilk ceyran sürüsünün hərəkətləri barədə gündə bir neçə dəfə peyk vasitəsilə məlumatlar alınır.
Ekologiya və Təbii Sərvətlər Nazirliyindən AZƏRTAC-a bildirilmişdir ki, məlumatlar ceyranların bədənlərinə bağlanmış xüsusi siqnalötürücü xalta vasitəsilə ötürülür.
Peyk məlumatlarına əsasən ceyran dəstəsinin bir qrupu Güzdək qəsəbəsinin cənub-qərb, ikinci qrupu isə Abşeron rayonunun Pirəkəşkül kəndinin qərb istiqamətində müşahidə olunmuşdur. Hərəkət istiqamətlərindən asılı olaraq ceyranların quru ot və su ilə təminatı həyata keçirilir.
Ərazidə mühafizə rejiminin təmin olunması məqsədi ilə Ekologiya və Təbii Sərvətlər Nazirliyinin 4 saylı Ərazi Ekologiya və Təbii Sərvətlər Şöbəsinin əməkdaşlarından ibarət qrup yaradılmışdır.
Ərazidə fəaliyyət göstərən fermer və çobanlardan reintroduksiya olunan ceyranların həyatı üçün təhlükə törədə biləcək hər hansı fəaliyyətdən çəkinmələrinə dair iltizamlar alınmış, ərazidə maarifləndirici təbliğat lövhələri vurulmuşdur.
“Azərbaycan Respublikası ərazisində ceyranların mühafizəsi, reintroduksiyası və tarixi areallarının yenidən bərpası” layihəsi çərçivəsində ceyranların tarixi ərazilərində məskunlaşdırılması işi bu ildə davam etdiriləcəkdir.
######
Bölmənin digər xəbərləri
