Çaylarda keçirilən monitorinqin nəticələri açıqlanmışdır
Bakı, 24 may (AZƏRTAC). Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların qollarının çirklənmə səviyyəsini öyrənmək məqsədi ilə may ayının ikinci ongünlüyü üçün monitorinq keçirmişdir.
Nazirliyin mətbuat xidmətindən AZƏRTAC-a bildirmişlər ki, Kür çayında su sərfi may ayının birinci ongünlüyünə nisbətən 208 kubmetr/saniyə azalaraq 787 kubmetr/saniyə təşkil etmişdir. Gürcüstan və Ermənistan ərazilərindən təmizlənmədən axıdılan məişət tullantıları və çirkab sularının təsiri nəticəsində çayda biogen maddələrin miqdarı normadan dəfələrlə artıq olmuşdur. Şıxlı-2 və Ağstafaçay məntəqələrində suyun əsas çirkləndiricilərindən olan mis birləşmələri 3, fenollar 4 dəfə yol verilən qatılıq həddini keçmişdir.
Araz çayının Horadiz, Birinci Şahsevən və Bəhramtəpə məntəqələrində də normadan çox zərərli maddələr qeydə alınmışdır.
Suyun oksigen rejimi bütün məntəqələrdə sanitar norma daxilində dəyişmişdir.
Bölmənin digər xəbərləri
