Çexiyada Ümummilli Liderin 100 illiyinə həsr olunmuş gənclər forumu təşkil ediləcək
Praqa, 20 aprel, AZƏRTAC
Azərbaycanın Çex Respublikasındakı səfirliyi, Gənclər Fondu və Azərbaycanlı Tələbələr və Məzunlar Platformasının (ASAP) birgə təşkilatçılığı ilə Çexiyada təhsil alan tələbələrlə səfirlikdə görüş keçirilib.
AZƏRTAC xəbər verir ki, görüşdə səfir Adış Məmmədov, Gənclər Fondunun icraçı direktoru Fərid Cəfərov, Azərbaycanlı Tələbələr və Məzunlar Platformasının icraçı direktoru Rafael Hacıbəyli və Praqada təhsil alan iyirmidən çox azərbaycanlı tələbə iştirak edib.
Görüşdə çıxış edən səfir Adış Məmmədov Azərbaycanda dövlət tərəfindən həyata keçirilən gənclər siyasəti və Azərbaycan gəncliyinin qarşısında duran vəzifələrdən danışıb. Sonra səfir Çexiyada yaşayan həmvətənlərimizlə, xüsusilə də tələbə gənclərlə mövcud olan əlaqələr haqqında danışaraq, müxtəlif universitetlərdə oxuyan gəclərimizin yüksək təhsil almaları ilə yanaşı, ölkəmizin təbliği və dövlətçilik maraqlarımızın qorunması istiqamətində də aktiv fəaliyyət göstərmələrinin zəruri olduğunu bildirib. Gənclərin, xüsusilə də xarici ölkələrdə təhsil alan tələbələrimizin Azərbaycan dövlətinin qayğısı və Prezident İlham Əliyevin daim himayəsi altında olduğunu bildirən səfir, Çexiyada təhsil alan tələbə gənclərimizin də səfirliyimizin diqqət mərkəzində olduğunu qeyd edib. O gənclərimizin azərbaycançılıq naminə bu və ya digər fəaliyyətinə daim dəstək verməyə hazır olduğunu bildirib.
Sonra Gənclər Fondunun icraçı direktoru Fərid Cəfərov və ASAP-ın icraçı direktoru Rafael Hacıbəyli gənclərlə geniş fikir mübadiləsi apararaq, gənclərin təşkilatlanması və gələcək fəaliyyətləri ilə bağlı fikirlərini bölüşüb, bu istiqamətdə gənclərə daim dəstək verməyə hazır olduqlarını qeyd ediblər.
Tədbirin sonunda Azərbaycanın Çex Respublikasındakı səfirliyi və Gənclər Fondunun birgə layihəsi olaraq cari ildə Praqa şəhərində Ümummilli Lider Heydər Əliyevin 100 illiyinə həsr edilmiş gənclər forumunun təşkil olunacağı qərara alınıb.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
