Dağ çaylarında sululuq normadan yüksəkdir
Bakı, 29 yanvar (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamentindən AZƏRTAC-a verilən məlumata görə, son günlər dağlıq ərazilərdə yağan qarın tədricən əriməsi və yağan yağıntılarla əlaqədar dağ çaylarında sululuğun artımı müşahidə olunmuşdur.
Hazırda dağ çaylarında sululuq normadan yüksəkdir.
Ən yüksək sululuq Böyük Qafqazın Balakən-Şəki bölgəsi çaylarında müşahidə olunur ki, bu da ongünlük normanın 240-270, Kiçik Qafqaz çaylarında 150-160, Lənkəran-Astara bölgəsi çaylarında 95-150, Naxçıvan MR çaylarında isə 55-180 faizini təşkil edir.
Kür çayının Qıraqkəsəmən məntəqəsində su sərfi ongünlük normanın 80 faizini, Qanıx çayının Əyriçay məntəqəsində isə su sərfi ongünlük normanın 76 faizini təşkil edir.
Kür çayının aşağı axınında suyun səviyyəsində azalma davam etməkdədir. Ümumiyyətlə, yanvar ayı ərzində Kür çayının Yevlax məntəqəsində suyun səviyyəsi 41 santimetr, Zərdabda 60 santimetr, Surrada 32 santimetr, Şirvanda 17 santimetr, Salyanda 10 santimetr, Bankədə 7 santimetr, Araz çayının Novruzlu məntəqəsində isə 18 santimetr azalma vardır.
Hazırda Surra məntəqəsində suyun hazırkı səviyyəsi 460 santimetr, Şirvanda 364 santimetr, Bankədə 288 santimetr, Salyanda 186 santimetr, Araz çayının Novruzlu məntəqəsində isə 240 santimetrdir.
Kür çayının aşağı axınında müşahidə olunan hazırkı səviyyə 2010-cu ilin müvafiq dövrü ilə müqayisədə 106-200 santimetr aşağıdır.
Bölmənin digər xəbərləri
