İDMAN
Daniil Şıxov: Bakıdakı Avropa çempionatında medal qazandığım üçün çox xoşbəxtəm
Bakı 29 iyul, AZƏRTAC
İlk dəfədir Bakıdayam. Avropa çempionatının yüksək səviyyədə təşkili Bakının bu yarışa ciddi hazırlaşdığını deməyə əsas verir. Bakı Atıcılıq Mərkəzi isə bir sözlə möhtəşəmdir. Belə mötəbər yarışda fəxri kürsüdə yer almağıma görə çox xoşbəxtəm.
Bu sözləri Bakıda keçirilən atıcılıq üzrə Avropa çempionatının bürünc mükafatçısı rusiyalı Daniil Şıxov AZƏRTAC-a məxsusi müsahibəsində deyib.
Yüksək səviyyəli təşkilatçılığa və qonaqpərvərliyə görə minnətdarlığını bildirən rusiyalı idmançı vurğulayıb: “Belə mühüm idman tədbirinin mükəmməl təşkili, idmançılar və qonaqlar üçün hər cür şəraitin yaradılması məni heyran etdi. Öz ölkəmə qayıtdıqdan sonra Bakıda gördüklərimi bütün dostlarıma və yaxınlarıma danışacağam. Avropa çempionatında qitənin ən titullu və güclü idmançıları mübarizə aparırlar. Bakıdakı uğurumu növbəti yarışlarda da təkrarlamaq, qızıl medal qazanmaq üçün daha çox çalışacağam”.