Dayanıqlı sülhə doğru növbəti addım: 18-ci məqsəd reallaşır
Bakı, 6 iyul, AZƏRTAC
Bu gün münaqişələrdən əziyyət çəkən dövlətlərin dünya nizamının yenidən qurulmasında səyləri, dördüncü sənaye inqilabının çağırışlarının yeni düzəndə əks olunması istiqamətində nəzərəçarpan geosiyasi mübarizə ölkələri xarici siyasətlərində daha həssas olmağa sövq edir.
Bunu Milli Məclisin deputatı Məzahir Əfəndiyev AZƏRTAC-a açıqlamasında deyib.
“Azərbaycan İkinci Qarabağ - Vətən müharibəsi nəticəsində tarixi ədaləti bərpa etməklə 2020-ci ildə 30 il işğal altında saxlanılan torpaqlarını azad edərək güc mərkəzlərinin ədalətsiz münasibətinə son qoydu, dövlət maraqlarını təmin etdi. Eyni zamanda, qeyri-qanuni fəaliyyət göstərən silahlı qruplaşmaları məhv edərək ərazi bütövlüyü və suverenliyini bərpa etdi.
Azərbaycanın hərbi uğuru və nümayiş etdirdiyi potensialına beynəlxalq müstəvidə sevinən dost dövlətlərlə yanaşı, son zamanlarda bu uğurlara maneə olmağa çalışan ölkələr da açıq-aydın özlərini göstərməyə başlayıblar. Bu gün müxtəlif vaxtlarda Azərbaycanla qarşılıqlı hörmətə əsaslanmış və gələcəyə yönəlmiş inkişaf strategiyaları olan Fransa Respublikası Cənubi Qafqazda davamlı sülhün bərqərar olmasına əngəl törədir və bu, Fransa iqtidarına rəhbərlik edən hökumət rəsmilərinin münasibətində də açıq-aydın görünməkdədir.
Ümumiyyətlə Fransa-Azərbaycan münasibətləri son 30 ildə prinsip etibarı ilə yalnız inkişafa doğru köklənmişdi. Bu münasibətlərdə Azərbaycan hər zaman Fransanı Avropanın mədəni paytaxtı olaraq bir sıra məsələlərdə, yaradılan mexanizmlərdə daha çox dəstəkləməyə çalışıb. Azərbaycanın postmüharibə dövründə sülh sazişinin imzalanması üçün Fransanın iştirakına, onun öz sülhməramlı missiyasını yerinə yetirməsinə imkan yaratmasına baxmayaraq, biz Fransa Prezidentinin həmin fürsətdən istifadə etmək əvəzinə Azərbaycanı qaralamaqla məşğul olduğuna şahidlik edirik”, - deyə deputat bildirib.
O qeyd edib ki, Azərbaycan bugünkü dünya reallıqlarını çox yaxşı görür və nəinki Avropada, Asiyada, Şimali və Cənubi Amerikada, hətta bütün dünyada sülhün, əmin-amanlığın və təhlükəsizliyin təmin olunması üçün mövcud resurslardan maksimum dərəcədə istifadə edir.
Ölkənin zəngin enerji resurslarının ehtiyacı olan Avropa ölkələrinə nəql edilməsi, müsəlman ölkələri ilə ictimai-mədəni əlaqələrin daha da dərinləşdirilməsi, yoxsul, xüsusilə Afrika ölkələrinə humanitar yardımların göstərilməsi, dünya ticari əlaqələrinin möhkəmlənməsində Şərqdən Qərbə, Şimaldan Cənuba logistik potensialın genişləndirilməsi Prezident İlham Əliyevin çoxvektorlu və tarazlı xarici siyasətini ehtiva edir.
“Bu baxımdan artıq son illər kifayət qədər təşkilatlanmış və nüfuz qazanmış Qoşulmama Hərəkatının Əlaqələndirmə Bürosunun “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlər görüşünün Bakı şəhərində keçirilməsi, bu platformanın daha da aktivləşməsi Prezident İlham Əliyevin və rəsmi Bakının sülhə doğru atdığı növbəti vacib addımlardan biridir. Prezident İlham Əliyevin həmin toplantıda çıxışı zamanı qeyd etdiyi məqamlar, xüsusilə də Dayanıqlı İnkişaf Məqsədlərinə nail olunması üçün Birləşmiş Millətlər Təşkilatı tərəfindən həyata keçirilən “2030 Gündəliyi”nin genişləndirilməsi istiqamətində fikirləri mövcud dünya siyasətinin yenidən formalaşan arxitekturasının möhkəmlənməsinə xidmət edir. Prezident İlham Əliyev çıxışında təcrübədə rastlaşdığı vacib, aktual məsələyə bir daha toxundu. Bildiyimiz kimi, ərazilərimiz Ermənistanda istehsal olunan və qeyri-qanuni erməni silahlı dəstələri vasitəsilə daşınan minalarla çirkləndirilməkdədir. Bu hallar, həmçinin Azərbaycan misalında digər münaqişə və postmünaqişə zonalarında da yaşanmaqdadır. Heç kəsə sirr deyil ki, bu gün dünyamızda müharibələrdən əziyyət çəkən xalqlar, millətlər, eyni zamanda, mina terrorunun da qurbanı olurlar.
Qoşulmama Hərəkatının sədri olaraq Prezident İlham Əliyevin vurğuladığı kimi, Azərbaycan humanitar minatəmizləmə üzrə xüsusi milli Dayanıqlı İnkişaf Məqsədi müəyyənləşdirib. Bundan başqa, Azərbaycan qlobal miqyasda humanitar minatəmizləmə səylərini dəstəkləyir və minatəmizləmənin 18-ci Dayanıqlı İnkişaf Məqsədi olması təklifini irəli sürmüşdür.
Azərbaycan Prezidentinin Dayanıqlı İnkişaf Məqsədlərinə yeni 18-ci maddənin əlavə olunması təklifi, bilavasitə Birləşmiş Millətlər Təşkilatının nizamnaməsi və fəaliyyət prinsiplərinə əsasən günahsız, sivil insanların minaya düşərək həlak olmasının qarşısının alınması, onların yaşamaq hüququnun təmin olunmasına hesablanmışdır”, - deyə Məzahir Əfəndiyev vurğulayıb.
Onun sözlərinə görə, Prezident İlham Əliyevin Qoşulmama Hərəkatının Əlaqələndirmə Bürosunun nazirlər görüşündə dünyaya səslənməsi bir daha dövlətimizin başçısının rəhbərliyi ilə Azərbaycanın bu günə qədər sülhə doğru atdığı addımların və səsləndirdiyi fikirlərinin bariz göstəricisidir.
Qoşulmama Hərəkatı Azərbaycanın sədrliyi ilə yenidən özünün mövcud qlobal problemlərin həlli istiqamətində rolunu və potensialını nümayiş etdirir. Bundan öncə Qoşulmama Hərəkatının Parlament Şəbəkəsinin ilk görüşü, daha sonra Gənclər Şəbəkəsinin baş tutan tədbirləri və bu dəfə də nazirlər görüşünün keçirilməsi deməyə əsas verir ki, bu təşkilatın institusional mərkəzinin təsis olunması da yaxın gələcəkdə reallaşa bilər.
Bölmənin digər xəbərləri
