Dəniz obyektlərində aparılan qazma işlərinə ekoloji nəzarət monitorinqləri həyata keçirilir
Bakı, 24 fevral (AZƏRTAC). Cari ilin yanvar-fevral aylarında Azərbaycan Respublikası Dövlət Neft Şirkəti Kompleks Qazma İşləri Trestinin tabeçiliyində olan müəssisələr tərəfindən dərin dəniz özüllərində aparılan qazma işləri zamanı ətraf mühitə təsirin öyrənilməsi məqsədilə Ekologiya İdarəsi ekoloji monitorinq departamentinin ekoloji tədqiqatlar ekspedisiyası tərəfindən “Günəşli”, “Neft daşları”, “Ələt-dəniz”, “8 mart”, Bulla-dəniz” və “Pirallahı-dəniz” yataqlarında ekoloji nəzarət monitorinqi aparılmışdır.
Şirkətin mətbuat xidmətindən AZƏRTAC-a bildirmişlər ki, monitorinq zamanı dərin dəniz və stasionar dəniz özüllərində aparılan qazma işləri nəticəsində ətraf mühitə təsirin müxtəlif amilləri öyrənilmiş və qiymətləndirilmişdir. Kimyəvi işlənmiş qazma şlamı xüsusi konteynerlərə toplanmış və gəmilər vasitəsilə sahilə daşınaraq Ekologiya İdarəsinin tullantı mərkəzinə təhvil verilmişdir. İstehsalat prosesi zamanı formalaşan istehsalat-çirkab suları çənlərdə toplanmış, məişət-çirkab sularının zərərsizləşdirilməsi üçün yeni, kiçik həcmli bioloji qurğuların alınması nəzərdə tutulmuşdur.
Ekologiya İdarəsinin müvafiq ekspedisiyaları tərəfindən digər dərin dəniz və stasionar dəniz özüllərində aparılan qazma işlərinin də davamlı monitorinqi nəzərdə tutulmuşdur.
Bölmənin digər xəbərləri
