Deputat: Dövlət əhaliyə tək insan resursu kimi deyil, insan kapitalı kimi baxır VİDEO
Bakı, 14 oktyabr, AZƏRTAC
İşğaldan azad edilmiş ərazilərdə genişmiqyaslı abadlıq və quruculuq işləri ardıcıl şəkildə davam etdirilir. Hələlik ərazinin müəyyən hissəsinin minadan təmizlənməsi prosesi gedir, lakin bu gün Qarabağda həyata keçirilən layihələr təkcə bu günümüzə deyil, gələcəyimizə də çox ciddi təsir göstərir.
AZƏRTAC xəbər verir ki, bu sözləri Milli Məclisin deputatı Şahin Seyidzadə Xəzər İnşaat Həftəsi çərçivəsində keçirilən “Qarabağın dirçəlişində gənclər: təşəbbüslər və imkanlar” mövzusundakı panel müzakirəsində deyib.
O bildirib ki, Böyük Qayıdışa dair Dövlət Proqramı çərçivəsində dövlət əhaliyə tək insan resursu kimi deyil, insan kapitalı kimi baxır.
“Proqramın əsas prinsiplərindən biri qayıdan ailələrin məşğulluğunun təmin olunmasıdır. Qarabağ Universitetinin fəaliyyəti bu sahədə ən böyük institusional addımlardan biridir. Qarabağ Universiteti sadə bir ali təhsil müəssisəsi deyil. Hazırda orada 3300 tələbə təhsil alır, onların 600-dən çoxu 500-dən artıq bal toplayıb. Son iki il ərzində orta bal göstəricisi 50 faiz artıb. Universitetdə yataqxana da tamamilə ödənişsizdir. Bütün bunlar keyfiyyət və kamillik göstəricisidir”, - deyə deputat əlavə edib.
Ş.Seyidzadə qeyd edib ki, azad olunmuş torpaqların bərpası yalnız infrastruktura və tikintiyə söykənməməlidir: “Biz öz torpaqlarımızın bərpasını tək daşla, tikinti ilə edə bilmərik. Bu torpaqların bərpası həm də ruhla, enerji ilə, biliklə və insan kapitalı ilə olmalıdır. Yaxın zamanlarda Qarabağ Universitetində magistratura pilləsinin də açılması nəzərdə tutulur”.
Bölmənin digər xəbərləri
