Deputat: Regionların inkişafı əhalinin həyat səviyyəsinin daha da yaxşılaşdırılmasına zəmin yaradır
Bakı, 11 avqust, AZƏRTAC
Ölkəmizdə uğurla həyata keçirilən sosial-iqtisadi inkişaf strategiyasının mühüm tərkib hissəsindən biri də regionlarının inkişafıdır. Bu sahədə qəbul edilən və həyata keçirilən dövlət proqramları üzrə vəzifələrin icrası ölkədə qeyri-neft sektorunun davamlı inkişafına təkan verir. Mütəmadi olaraq reallaşdırılan layihələr bölgələrdə sosial infrastrukturun təminatını, əhaliyə göstərilən xidmətlərin keyfiyyətinin yüksəldilməsini, sahibkarlıq mühitinin daha da yaxşılaşdırılmasını özündə ehtiva edir. Yeni müəssisələrin istifadəyə verilməsi ilə yeni iş yerləri açılır, əhalinin məşğulluğu təmin edilir. Bir sözlə, 2004-cü ildən etibarən uğurla icra olunan dövlət proqramları nəticəsində regionlarda şəhər, qəsəbə və kəndlərin siması köklü şəkildə dəyişib, regionların potensialı xeyli artıb, rentabellik yüksəlib.
Prezident İlham Əliyevin regionlara son səfəri bir daha göstərdi ki, hazırda böyük infrastruktur layihələrinin reallaşdırıldığı Qarabağ və Şərqi Zəngəzur da daxil olmaqla, bütün bölgələrimizin inkişafı dövlətimizin diqqət mərkəzində saxlanılır.
Bu fikirləri AZƏRTAC-a açıqlamasında Milli Məclisin deputatı Aqil Məmmədov səsləndirib.
“Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”ı çərçivəsində ötən müddətdə xeyli işlər görüldüyünü diqqətə çatdıran A.Məmmədov bildirib ki, dövlətimizin məqsədi hər şeydən əvvəl regionlarda yaşayan əhalinin məmnunluğunun artırılması, onların yaşayış səviyyəsinin yüksəldilməsidir.
“Dünya qlobal iqtisadi böhranla üzləşdiyi və işğaldan azad edilmiş ərazilərdə nəhəng quruculuq işlərinin aparıldığı bir vaxtda Azərbaycan Prezidenti regionların sosial-iqtisadi inkişafını diqqətdə saxlayır. Dövlətimizin başçısı növbəti səfərində Bərdə, Qazax, Şəmkir və Samux rayonlarında oldu, bir sıra mühüm infrastruktur obyektlərinin açılışını etdi. Prezident İlham Əliyevin görülən işlərə birbaşa nəzarət etməsi əhalidə böyük ruh yüksəkliyi ilə qarşılanır.
Ölkəmizdə əhalinin sağlamlığının mühafizəsi daim diqqətdə saxlanılır. Bu istiqamətdə paytaxtla bərabər, regionlarda səhiyyə xidmətinin keyfiyyətinin yüksəldilməsi, idmanla məşğul olmaları üçün tibb müəssisələri, sanatoriyalar, idman bazaları istifadəyə verilir. Regionlarda açılan növbəti tibb müəssisəsi Samux Rayon Mərkəzi Xəstəxanası oldu. 2019-cu ildə inşa edilməyə başlayan xəstəxana 90 çarpayılıqdır. Tibb müəssisəsinin üçmərtəbəli binasında əhaliyə ən müasir tələblər səviyyəsində lazımi şərait yaradılması, Yaponiya, Koreya Respublikası, İtaliya və Türkiyə istehsalı olan ən müasir avadanlıqla təchiz edilməsi vətəndaşların hərtərəfli tibbi xidmətlə təmin edilməsinə yönəldilib”, - deyə A.Məmmədov vurğulayıb.
Deputatın sözlərinə görə, regionların sosial-iqtisadi inkişafına dair dövlət proqramının ən uğurlu nəticələrindən biri də ölkədə daha əlverişli biznes və investisiya mühitinin formalaşması, iş adamlarının fəaliyyət imkanlarının genişlənməsi, bölgələrin istehsal potensialının artırılmasıdır.
Bölgələrdə iqtisadiyyatın liberallaşdırılması, investisiya qoyuluşunun həcminin artırılması sahibkarlığın inkişafına təkan verməklə bərabər, sərbəst bazar prinsiplərinin dərinləşdirilməsinə rəvac verir. Bu da milli sahibkarların ümumi daxili məhsuldakı xüsusi çəkisini artırır.
Qazax rayonunda “Venzana” mebel fabrikinin açılışının əhəmiyyətini qeyd edən A.Məmmədov deyib: “Yeni müəssisələr, fabrik və zavodlar insanların yeni iş yerləri ilə təmin olunması, məşğulluğun artırılmasına xidmət edir. Bu da vətəndaşların məmnunluğunun təmin edilməsi istiqamətində mühüm layihələrin reallaşdırıldığını sübuta yetirir”.
Deputat vurğulayıb ki, vətəndaşların həyat səviyyəsinin yüksəldilməsi, onların məmnunluğuna xidmət edən amillərdən biri də göstərilən kommunal və digər xidmətlərin keyfiyyətinin yaxşılaşdırılmasıdır. Ölkəmizdə fəaliyyət göstərən mərkəzlərin sırasına Qarabağ Regional DOST Mərkəzinin də əlavə olunduğunu diqqətə çatdıran A.Məmmədov əlavə edib: “Ölkə vətəndaşları DOST Mərkəzinin xidmətlərindən çox razıdırlar. Dövlətimiz 2025-ci ilədək mərkəzlərin sayını 17-yə, yerlərdə xidmətlərin təşkili məqsədilə filialların sayını 55-ə çatdırmağı planlaşdırır. Bu, qürurvericidir. İnsanlar belə mərkəzlərin hesabına artıq vaxt itirmir, öz işlərini vaxtında həll edə bilirlər”.
Ən yüksək tələblərə cavab verən Qarabağ Regional DOST Mərkəzinin əhatə dairəsinə 9 inzibati rayonun daxil edildiyini bildirən Aqil Məmmədov Mərkəzin gün ərzində orta hesabla 650-700 vətəndaşı qəbul etmək imkanına malik olmasını yüksək dəyərləndirib.
“Prezident İlham Əliyevin birbaşa nəzarəti ilə həyata keçirilən dövlət proqramları regionların davamlı inkişafına zəmin yaratmaqla bərabər, ölkə iqtisadiyyatında qeyr-neft sektorunun payının artmasına, əhalinin həyat səviyyəsinin daha da yaxşılaşdırılmasına zəmin yaradır”, - deyə Aqil Məmmədov fikirlərini yekunlaşdırıb.
Bölmənin digər xəbərləri
