Dostluq münasibətləri Azərbaycan-Tacikistan əlaqələrinin gələcək inkişafına böyük töhfə verəcək
Bakı, 8 aprel, AZƏRTAC
Azərbaycan Prezidenti İlham Əliyev Mərkəzi Asiya dövlətləri ilə siyasi, iqtisadi əlaqələrin yaradılmasına və inkişaf etdirilməsinə xüsusi diqqət ayırır. Bu regionda yerləşən dövlətlər Azərbaycanla münasibətləri yüksək səviyyəyə çatdırmağa böyük maraq göstərir. Mərkəzi Asiya regionunda yerləşən dörd türkdilli dövlətlə Azərbaycan arasında ikitərəfli və çoxtərəfli sıx iqtisadi-siyasi əlaqələr qurulub. Bu dövlətlərlə ticarət dövriyyəsi hər il artmaqdadır.
Bu fikirləri AZƏRTAC-a açıqlamasında Milli Məclisin deputatı, professor Kamilə Əliyeva söyləyib.
Tacikistanla Azərbaycan arasında qardaşlıq münasibətlərinin əsasının ötən əsrin 90-cı illərinin əvvəlində qoyulduğunu bildirən deputat qeyd edib ki, Ulu Öndər Heydər Əliyev və Tacikistanın hazırkı Prezidenti Emoməli Rəhmon bu əlaqələrin inkişafına və ölkələr arasında dostluq münasibətlərinin qurulmasına böyük töhfə veriblər.
“Prezident İlham Əliyevin Tacikistana səfərləri iki ölkə arasındakı münasibətləri daha da yaxınlaşdırıb. Bu il aprel ayının 5-də Prezident İlham Əliyev Tacikistana növbəti dəfə rəsmi səfər etdi. Səfər zamanı iki dövlət arasında həyatın bir çox sahələrini əhatə edən sənədlər imzalandı. Bu gün Tacikistan yeni inkişaf mərhələsinə qədəm qoyan dövlətlərdəndir. Bu ölkədə siyasi sabitlik hökm sürür. Sabitlik olmayan dövlətlər heç vaxt iqtisadi inkişafa və ölkənin müstəqil siyasət yürütməsinə nail ola bilməz. Azərbaycanın böyük dövlət və özəl şirkətləri Tacikistana investisiya qoymağa hazırdır. Bu gün Tacikistanla Azərbaycan arasında illik ticarət dövriyyəsi cəmi 6,5 milyon manat təşkil edir”, - deyə K.Əliyeva qeyd edib.
Onun sözlərinə görə, hər iki dövlət arasında imzalanmış sənədlər ticarət dövriyyəsinin həcminin dəfələrlə artmasına imkan verir. Tacikistan Çindən Avropaya gedən İpək yolu üzərində yerləşən bir ölkədir. Bu gün bir çox dövlətlərin İpək yolunun açılmasına maraq göstərməsi Tacikistanın da inkişafına böyük təsir göstərəcək. Eyni zamanda, Azərbaycan Şərq-Qərb, Şimal-Cənub marşrut qovşağında yerləşir. Azərbaycanın ölkə daxilində yaratmış olduğu nəqliyyat və logistika infrastrukturu imkan verir ki, Avropa ilə Asiyanı birləşdirən, Azərbaycan və Tacikistandan da keçməklə yeni bir marşrut dəhlizi yaransın. Azərbaycan və Tacikistan Prezidentlərinin də dostluq münasibətləri hər iki dövlətin gələcək inkişafına böyük töhfə verəcək.
Bölmənin digər xəbərləri
