Dövlət Akademik Filarmoniyasında silsilə konsertlər keçiriləcək
Bakı, 3 aprel, AZƏRTAC
Aprelin 11-də M.Maqomayev adına Azərbaycan Dövlət Akademik Filarmoniyasında Hacıbəyovlar nəslinin görkəmli nümayəndələri bəstəkar Soltan Hacıbəyov-105 və İsmayıl Hacıbəyovun-75 illiklərinə həsr olunmuş konsert keçiriləcək.
Filarmoniyadan AZƏRTAC-a bildirilib ki, musiqili gecədə bədii rəhbər və baş dirijor, Əməkdar artist Fuad İbrahimovun rəhbərliyi ilə Ü.Hacıbəyli adına Azərbaycan Dövlət Simfonik Orkestri hər iki bəstəkarın əsərlərini səsləndirəcək.
Aprelin 20-də isə Filarmoniyanın səhnəsində Azərbaycan bəstəkarlıq məktəbinin layiqli davamçılarından biri, Qara Qarayevin sinfini bitirən bəstəkar Leonid Vaynşteynin 80 illiyinə həsr olunmuş konsert təşkil olunacaq.
Konsertdə Ü.Hacıbəyli adına Azərbaycan Dövlət Simfonik Orkestri (bədii rəhbər və baş dirijor Fuad İbrahimov), Azərbaycan Dövlət Xor Kapellası (bədii rəhbər, Xalq artisti Gülbacı İmanova) və Azərbaycan Dövlət Uşaq Filarmoniyasının xoru (bədii rəhbər Dilarə Əliyeva) L.Vaynşteynin əsərlərindən ibarət maraqlı proqramla çıxış edəcək.
Bölmənin digər xəbərləri
