DÖVLƏT SƏRHƏD XİDMƏTİNDƏ XOCALI FACİƏSİ QURBANLARININ XATİRƏSİ ANILMIŞDIR
Bakı, 25 fevral (AZƏRTAC). Dövlət Sərhəd Xidmətinin mətbuat mərkəzindən bildirmişlər ki, qurumun hərbi hissələrində Xocalı
soyqırımının 18-ci ildönümü ilə əlaqədar tədbirlər keçirilir.
Dövlət Sərhəd Xidmətinin mərkəzi aparatında fevralın 25-də keçirilən tədbirdə şəxsi heyət əvvəlcə dəhşətli faciəni əks etdirən fotosərginin materialları ilə tanış olmuşdur.
Sonra tədbir iştirakçıları faciə zamanı həlak olmuş soydaşlarımızın xatirəsini bir dəqiqəlik sükutla yad etmişlər.
Tədbirdə Dövlət Sərhəd Xidməti rəisinin müavini, general-mayor Məhəmməd Abbasquliyev və Milli Məclisin deputatı Gültəkin Hacıbəyli çıxış edərək dinc azərbaycanlı əhaliyə qarşı törədilmiş soyqırımı barədə ətraflı məlumat vermiş, qətliamın səbəb və nəticələri haqqında danışmışlar.
Xüsusi vurğulanmışdır ki, Xocalı soyqırımının beynəlxalq aləmdə tanınması və erməni faşizminin ifşası ilə bağlı ilk addımlar ulu öndər Heydər Əliyevin təşəbbüsü ilə atılmışdır. Dövlətimizin başçısı İlham Əliyevin məqsədyönlü daxili və xarici siyasəti sayəsində Azərbaycan həqiqətlərinin, o cümlədən Xocalı soyqırımı barədə məlumatların dünya ictimaiyyətinə çatdırılması səfirliklərimiz və diaspor təşkilatlarımız qarşısında vacib məsələ kimi qoyulmuşdur.
Tədbirdə insan hüquqlarının kütləvi və kobud surətdə pozulması faktına hələ də beynəlxalq miqyasda hüquqi qiymətin verilmədiyi, ermənilərin işğalçı, şovinist əməllərinə qarşı qəti tədbirlər görülmədiyi təəssüf hissi ilə qeyd edilmiş, ölkə rəhbərliyinin bu istiqamətdəki ardıcıl və uğurlu fəaliyyətinin müsbət nəticə verəcəyinə əminlik ifadə olunmuşdur.
######
Bölmənin digər xəbərləri
