Dözümsüzlüyün dövlət tərəfindən dəstəkləndiyi Ermənistan regionun yeganə monoetnik dövlətidir
Bakı, 11 aprel, AZƏRTAC
Tanınmış ekspert Maksim Qauin “The Times of Israel” qəzetində yayılmış məqaləsində ermənipərəst tarixçi Yair Auronun “Haaretz” qəzetində Azərbaycanla bağlı dərc edilmiş qərəzli yazısına tutarlı cavab verib. M.Qauin qərəzli tarixçinin bu məqaləni hazırlayarkən səmimi olmadığını onun özünün “Şübhəsiz ki, mən bir qədər subyektiv və tərəfkeş mövqedəyəm” yazması ilə etiraf etdiyini vurğulayır.
Bildirilir ki, Y.Auronun bu yazısında İsrailin milli marağı qətiyyən öz əksini tapmır, Azərbaycanın İsrail üçün daşıdığı önəm göstərilmir. Ermənistanda hökumətin dəstəklədiyi antisemitizm və onun nəticələri qeyd olunmur. Auron Ermənistanda hakimiyyətdə olan Respublika partiyasının əsas ilham mənbəyi və Ermənistan nasist müharibə cinayəti sayılan Njdeh abidəsi barədə də bir kəlmə yazmır.
O, heç bir dəlil gətirmədən “erməni soyqırımı” barədə əsassız iddialar irəli sürür.
M.Qauin yazır: “Mən elə bu bloqda ermənilərlə bağlı “soyqırımı” sözünün istifadəsinin mümkünsüzlüyünün səbəbini izah etmişəm. Auron mənim göstərdiyim dəlilləri təkzib etmir. Eyni hadisə “erməni soyqırımı”nın dəstəkləndiyi əsas kitablardan birinin mənbələrin təhrif olunmasına əsaslandığını göstərən 17 səhifəlik yazımın Britaniyanın elmi jurnalında çap olunmasından sonra da baş vermişdi və tənqid etdiyim müəllif mənim tənqidlərimə cavab verməkdən imtina etdi. Bu, bir alimdən gözlənilməyən hərəkət idi”.
Vurğulanır ki, Auronun məqaləsində həm tarix, həm də İsrailin “erməni soyqırımı” məsələsinə münasibəti düzgün verilməyib. Onun İsrailin Azərbaycandakı səfiri Rafael Harpazın adından həmin məsələ ilə bağlı səsləndirdiyi fikirlər də həqiqətə uyğun deyil. Əslində səfirin 2012-ci ildə verdiyi bu bəyanatı tapmaq o qədər də çətin deyil.
İsrail Xarici İşlər Nazirliyinin mətbuat katibi Yiqal Palmorun açıqlamasına görə, İsrailin mövqeyi belədir ki, bu məsələ tarixçilər tərəfindən araşdırılmalı və siyasi müzakirə mövzusuna çevrilməməlidir. Yaxud başqa bir misal. 2011-ci ildə Deni Ayalon deyib ki, Knesset “erməni soyqırımı”nı tanımayacaq. Buna nail olmağa çalışanların heç bir şansı yoxdur.
“Amma Yair Auronun məqaləsinin məğzi Ermənistan-Azərbaycan, Dağlıq Qarabağ münaqişəsidir. Müəllif bu məsələdə həqiqətən də “tərəfkeş” olduğunu sübut edir. Çünki o, bu münaqişənin tarixi ilə bağlı tam əsassız, qərəzli fikirlər irəli sürür. Auron nədənsə Azərbaycanın Dağlıq Qarabağa bitişik yeddi rayonunun ermənilər tərəfindən işğal olunması məsələsinə toxunmur”, - deyə M.Qauin bildirir.
Məqaləsində Y.Auron ermənilərin azərbaycanlılara qarşı törətdikləri cinayətləri əsassız olaraq Azərbaycan tərəfinin üstünə yıxmağa çalışsa da, bunu faktlarla sübut edə bilmir. O, 1992-ci ildə Azərbaycan vətəndaşlarına qarşı törədilmiş və açıq-aydın sübut olunmuş Xocalı faciəsi ilə bağlı da nə isə yazmaqdan boyun qaçırır.
M.Qauin yazır ki, dözümsüzlüyün dövlət tərəfindən dəstəkləndiyi Ermənistan regionun yeganə monoetnik dövlətidir. Bu gün Azərbaycanda on minlərlə erməni yaşadığı halda, 1989-cu ildən Ermənistanda bir nəfər də olsun azərbaycanlı yaşamır. Auron Ermənistan rəhbərliyində təmsil olunan terrorçu şəxslərin Azərbaycana qarşı törədikləri cinayətləri də gizlətməyə çalışır. O, təcavüzkarı deyil, təcavüzün qurbanını günahlandırmağa çalışır, lakin buna nail ola bilmir.
Bölmənin digər xəbərləri
