Bakı, 18 yanvar (AZƏRTAC). Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, 20 Yanvar faciəsinin 21-ci ildönümü münasibətilə dünyanın müxtəlif ölkələrində yaşayan soydaşlarımız anım mərasimləri keçirəcək, şəhidlərimizin xatirəsini ehtiramla yad edəcəklər. Diaspor təşkilatlarımız bu yolla faciə haqqında yaşadıqları cəmiyyəti, digər xalqların diaspor təşkilatlarını məlumatlandıracaq, 20 Yanvar faciəsi, onun mahiyyəti barədə materialların icma və birliklərimizin nəzdində fəaliyyət göstərən media orqanlarında işıqlandırılmasını təmin edəcəklər.

RUSİYA FEDERASİYASI. 20 Yanvar şəhidlərinin xatirəsi hər il olduğu kimi, bu il də Rusiya Federasiyasının bir neçə şəhərində anılacaqdır. Moskvadakı Bakı kinoteatrında Azərbaycanın Rusiyadakı səfirliyi ilə Ümumrusiya Azərbaycan Konqresi birlikdə anım tədbiri keçirəcəkdir. Konqresin Sankt-Peterburq, Yekaterinburq, Xabarovsk, Ulan-ude, Samara, Tula, Ufa, Novosibirsk, Vladivostok, Həştərxan və digər şəhərlərdəki regional təşkilatları 20 Yanvar faciəsinin 21-ci ildönümünə həsr olunmuş müxtəlif tədbirlər təşkil edəcəklər.

UKRAYNA. Kiyev şəhərində Ukrayna Azərbaycanlıları Konreqsinin Azərbaycanın bu ölkədəki səfirliyi ilə birgə təşkil edəcəyi mərasimdə Qanlı Yanvar şəhidlərinin xatirəsi anılacaq, faciəyə həsr edilmiş dəyirmi masa keçiriləcək, şəhid olmuş insanların qəhrəmanlığından bəhs edən ədəbi-bədii tamaşa nümayiş etdiriləcəkdir. Konqresin Xarkov, Donetks, Dnepropetrovsk və digər bölgələrindəki regional qurumları da anım tədbirləri keçirəcəklər.

BELARUS. Minskdə də Belarus Azərbaycan İcmaları konqresi 20 Yanvar faciəsi qurbanlarının xatirəsini Azərbaycanın bu ölkədəki səfirliyi ilə birlikdə tədbir keçirəcəkdir. Anım mərasiminə toplaşanlara faciədən bəhs edən sənədli film göstəriləcək, bu qanlı tarix bir daha videogörüntülərdə izlənəcəkdir.

HOLLANDİYA. Benilüks Azərbaycanlıları Konqresi (BAK) Amsterdam şəhərində xalqımızın qan yaddaşında əbədi yaşayacaq 20 Yanvar faciəsinin 21 illiyi münasibətilə “Benilüks News” qəzetinin 20 Yanvar faciəsinə həsr olunmuş xüsusi buraxılışını nəşr etdirəcək və poçt vasitəsilə geniş auditoriyaya yayacaqdır. Bu ölkənin Den Haaq şəhətində isə Hollandiya Azərbaycanın Türk Kültür Dərnəyi anım tədbiri keçirəcəkdir.

20 Yanvar faciəsinin 21-ci ildönümünü Avropanın digər ölkələrində yaşayan soydaşlarımız da diqqətdə saxlayacaqlar.

FRANSA. Fransanın Strasburq şəhərindəki “Strasburq Azərbaycan Evi”, Tuluz şəhərindəki “Azərbaycanlı Tələbələrin Assosiasiyası” anım tədbirləri təşkil edəcəklər.

FİNLANDİYA. Finlandiya Azərbaycanlıları Assosiasiyası “20 Yanvar Azərbaycan xalqının hüzn və şərəf günüdür” adlı anım tədbiri keçirəcəkdir. Tədbirə türk icmalarının nümayəndələri, digər xalqların diasporlarının təmsilçiləri də dəvət olunmuşlar. “Finlandiya Azərbaycan Dostluq Cəmiyyəti”ndə də yanvar şəhidlərinin xatirəsi anılacaqdır.

DANİMARKA. Danimarkada fəaliyyət göstərən “Vətən” Cəmiyyəti də 20 Yanvar faciəsinin 21-ci ildönümünə həsr olunmuş tədbir keçirərək sənədli video kadrlar nümayiş etdirəcək, hadisədən bəhs edən kitab və broşürlar yayacaqdır.

İSVEÇ. Yüteborq şəhərində isə Azərbaycan Federasiyası İsveç (AFİ) faciənin 21-ci ildönümünü anacaqdır.

ESTONİYA. Tallində “Aydan” Estoniya-Azərbaycan Mədəniyyət Mərkəzinin keçirəcəyi toplantıda 20 Yanvar faciəsinə həsr olunmuş fotoşəkillər sərgilənəcək, film nümayiş etdiriləcəkdir. Litva Azərbaycanlıları Cəmiyyəti də 20 Yanvar hadisəsinə aid faktları və reallıqları bir daha bu ölkənin ictimaiyyətinin nəzərinə çatdıracaqdır.

LATVİYA. Latviyadakı “Ocaq” Mədəniyyət Mərkəzi də 20 Yanvar faciəsinin 21-ci ildönümü ilə əlaqədar tədbir keçirəcək. Budapeştdə fəaliyyət göstərən “Macar-Azərbaycan Dostluq Cəmiyyəti”.

RUMINİYA. Rumıniyadakı Azərbaycan Mədəniyyət və Gənclər Assosiasiyası, Kişineuda Moldova Azərbaycanlıları Konqresi, Praqada “Azər-Çex” Cəmiyyəti, Varşavada Azərbaycan-Polşa Birlik Assosiasiyası də ölkəmizin bu ölkələrdəki səfirlikləri ilə birgə Qanlı Yanvar qurbanlarını yad edəcəklər.

ALMANİYA. Almaniyadakı Azərbaycanlıların Əlaqələndirmə Mərkəzi Berlin-Azərbaycan Evi ilə birlikdə “Azadlığa aparan yol” adlı anım mərasimi təşkil edəcəkdir. Tədbirdə sənədli filmin nümayişi nəzərdə tutulmuşdur. Sonra isə matəm musiqisindən ibarət bədii hissə təqdim olunacaqdır. Alman-Azərbaycan Həmrəylik Cəmiyyəti də Berlində 20 Yanvar faciəsi qurbanlarının xatirəsini anacaqdır. Frankfurt Azərbaycan Cəmiyyətinin keçirəcəyi anım mərasimində 20 Yanvar faciəsi ilə bağlı qonaqlara ətraflı məlumat veriləcək, Göte Universitetinin kitabxanasında Azərbaycan bölməsinin açılışı olacaqdır. Drezdendəki “Alm.Az.” Cəmiyyəti, Maqdeburq şəhərindəki Saxsen-Anhalt Vilayəti üzrə Alman-Azərbaycan Cəmiyyəti, “Nürnberq Odlar Yurdu Cəmiyyəti”, Ştutqart-Azərbaycan Kültür cəmiyyətinin keçirəcəyi anım mərasimlərində yanvar hadisələri barədə məruzələr təqdim ediləcək, qanlı 20 Yanvardan bəhs edən sənədli film göstəriləcəkdir.

ABŞ - KANADA. 20 Yanvar faciəsini anma mərasimlərinə Kanadadakı Kvebek Azərbaycanlıları Assosiasiyası, ABŞ-ın Nyu York şəhərindəki “Amerika Azərbaycanlıları Cəmiyyəti”, Azərbaycan Nyu-York Assosiasiyası, Los-Anclesdə “Amerika-Azərbaycan Şurası”, Hyuston-Bakı Qardaşlaşmış Şəhərlər Assosiasiyası da keçirəcəkləri tədbirlərlə qatılacaqlar.

TÜRKİYƏ. Faciənin 21-ci ildönümü Türkiyənin müxtəlif yerlərində də qeyd olunacaqdır. Türkiyə-Azərbaycan Dərnəkləri Federasiyasına (TADEF) üzv olan təşkilatlar İstanbul, İzmit, İzmir, Manisa, Çanaqqala, Bakıkesir, Muğla, İqdır, Adana, Hatay, Aydın, Kocaeli və digər şəhərlərdə anım tədbirləri keçirəcəklər. Türkiyə-Azərbaycan Dərnəyi isə Ankara Keçiören Bələdiyyəsi ilə birlikdə 20 Yanvara həsr olunmuş tədbir keçirəcəkdir.

GÜRCÜSTAN. Gürcüstanın Marneuli şəhərində “Azərbaycan Mədəniyyət Mərkəzi” 20 Yanvar faciəsi ilə bağlı anım tədbiri keçirəcək, fotosərgi və bədii kompozisiya təşkil edəcəkdir. “Qeyrət” xalq hərəkatı da 20 Yanvar şəhidlərinin xatirəsini yad edəcəkdir. Tbilisidə isə Gürcüstan Azərbaycanlıları Konqresi “20 Yanvar Azərbaycanın azadlığı və suverenliyi naminə mübarizənin rəmzidir” mövzusunda dəyirmi masa təşkil edəcəkdir.

ORTA ASİYA RESPUBLİKALARI: Daşkənddə “Azərbaycan Mədəniyyət Mərkəzləri Assosiasiyası”, Astanada Qazaxıstan Azərbaycanlıları İttifaqı bu ölkədəki Azərbaycan səfirliyi ilə birlikdə, Almatıda isə Qazaxıstan Azərbaycanlıları Assosiasiyası, Bişkekdə “Türkdilli Dövlətlərin Siyasətinə Dəstək Fondu” səfirliklərimizə birgə anma tədbirləri keçirəcəklər.

BƏƏ-dəki “Azərbaycan Cəmiyyəti” də 20 Yanvar qırğınının 21-ci ildönümünü və faciə qurbanlarının xatirəsini anacaqdır.