DÜNYA BANKI NEFTLƏ ÇİRKLƏNMİŞ TORPAQLARIN TƏMİZLƏNMƏSİ ÜÇÜN KREDİT AYIRACAQDIR

10.01.2004 [12:22]
Çap et
A⁺ A^-

Ekologiya və təbii sərvətlər naziri Hüseynqulu Bağırov jurnalistlərə bildirmişdir ki, Abşeron yarımadasının neftlə çirklənmiş torpaqlarının təmizlənməsi layihəsinin həyata keçirilməsi üçün Azərbaycana Dünya Bankı 14-15 milyon dollar ayıracaqdır.

Nazirin sözlərinə görə, Bank bu vəsaitin ayrılmasına prinsipcə artıq razılıq vermişdir. Vəsaitin 50 faizi kredit şəklində, qalanı isə qrant kimi ayrılacaqdır. Bu il imzalanacaq kredit sazişi 2005-ci ildə həyata keçirilməyə başlanacaqdır.

H.Bağırov demişdir ki, layihənin gerçəkləşdirilməsindən əsas məqsəd çirklənmiş torpaqların təmizlənməsi üçün sənaye potensialı yaratmaqdır. Dünya Bankının vəsaiti hesabına hazırda neftlə çirklənmiş torpaqların təmizlənməsinə dair 5,1 milyon dollar dəyərində layihə artıq həyata keçirilir. Layihədə Abşeron yataqlarından birinin ətrafındakı 10 hektar torpağın təmizlənməsi nəzərdə tutulmuşdur. Bu layihə çərçivəsində çirklənmiş torpaqların 95-97 faizini yenidən yararlı hala salmağa imkan verən qurğu yaradılmışdır. Təmizləmə nəticəsində yığılan neftdən təyinatı üzrə istifadə etmək olar.

Nazirliyin məlumatına görə, Abşeron yarımadasında neftlə çirklənmiş torpaqların ümumi sahəsi 35,5 min hektardır.