Dünyanın ən çox rast gəlinən dəri xərçəngi növlərindən birinin səbəbi aşkarlanıb
Bakı, 10 avqust, AZƏRTAC
Elm adamları dünyanın ən çox rast gəlinən dəri xərçəngi növlərindən biri skuamöz hüceyrəli karsinomanın (cSCC) yeni, gözlənilməz səbəbini aşkar ediblər.
AZƏRTAC “sciencealert.com” saytına istinadla xəbər verir ki, ABŞ-da aparılan araşdırma zamanı məlum olub ki, indiyə qədər zərərsiz sayılan “beta-HPV” adlı insan papillomavirusu bəzi hallarda xərçəngin böyüməsini birbaşa sürətləndirə bilər. Bu kəşf 34 yaşlı bir qadının qeyri-adi xəstəliyinin araşdırılması zamanı edilib. Qadının dəri xərçəngi əməliyyatlardan və immunoterapiyadan sonra dəfələrlə geri qayıdırdı. Genetik testlər virusun onun dəri hüceyrələrinin DNT-sinə inteqrasiya etdiyini və xərçəngin inkişafına səbəb olan zülallar istehsal etdiyini üzə çıxardı. Bu, “beta-HPV” üçün ilk dəfə müşahidə edilən bir haldır. Məlum olub ki, qadında T hüceyrələrinin normal işləməsinə mane olan irsi immun pozğunluğu var. Bu səbəbdən orqanizmi virusa qarşı müdafiə qura bilməyib. Həkimlər ona sümük iliyi kök hüceyrə transplantasiyası həyata keçiriblər və bu, həm xərçəngi, həm də HPV ilə bağlı digər problemləri tamamilə aradan qaldırıb. Üç illik müşahidə dövründə xəstəlik geri qayıtmayıb.
Mütəxəssislər bildirirlər ki, bu kəşf immun sistemi zəif insanlarda cSCC-nin yaranma səbəbləri və müalicəsinə baxış bucağını dəyişdirə bilər. Həmçinin nəticələr fərdiləşdirilmiş xərçəng müalicələrinin nə qədər vacib olduğunu göstərir.
Bölmənin digər xəbərləri
