Düşərgə iştirakçısı: Dünyamızı daha təmiz saxlamalı və qorumalıyıq
Şəki, 19 avqust, Mustafa Dadaşov, AZƏRTAC
İndiyədək “İrəli” İctimai Birlik tərəfindən təşkil edilən bir neçə düşərgədə iştirak etmişəm. Ekologiya ilə bağlı düşərgədə iştirakım isə birinci dəfədir. Belə bir təşəbbüsə görə layihənin təşkilatçılarına minnətdarlığımı bildirirəm.
Bu sözləri AZƏRTAC-ın bölgə müxbirinə müsahibəsində “İrəli” İctimai Birliyinin təşkilatçılığı və QHT-lərə Dövlət Dəstəyi Agentliyinin dəstəyi ilə Şəkidə keçirilən “Ecoinnovators: Gənclər üçün ekoloji texnologiyalar və sosial sahibkarlıq düşərgəsi”nin iştirakçısı, Azərbaycan Texniki Universitetinin 4-cü kurs tələbəsi Muhəmmədəli Cavadzadə deyib.
Düşərgə iştirakçısı bildirib ki, belə tədbirlərdə iştirak müasir dövrün gənclərini hazırda olduqca aktual olan ekoloji problemlərə daha düzgün yanaşmağa, dünyamızı daha təmiz saxlamağa təşviq edir. “Fürsətdən istifadə edib gənclərə onu tövsiyə edərdim ki, atdığımız zibillərlə təbiətimizi korlandırmayaq. Çünki biz bu dünyanın bir parçasıyıq. Nə ediriksə, özümüzə edirik. Dünyamızı daha təmiz saxlamalı və qorumalıyıq ki, bizdən sonra gələcək gənc nəsillərə də örnək olaq”,- deyə M.Cavadzadə vurğulayıb.
Bölmənin digər xəbərləri
