Əbu-Dabi AIM İnvestisiya Sammitinə ev sahibliyi edəcək
Qahirə, 25 mart, AZƏRTAC
Aprelin 7-dən 9-dək Əbu-Dabidə AIM İnvestisiya Sammiti (Alternative Investment Management Summit) keçiriləcək. "Qlobal investisiya gələcəyinin xəritəsi: qlobal investisiya mənzərəsində yeni istiqamət, balanslaşdırılmış qlobal sistemə doğru" şüarı ilə keçiriləcək tədbirə 25 mindən çox nümayəndənin, o cümlədən dünya miqyasında tanınmış sərmayədarların iştirakı gözlənilir.
AZƏRTAC BƏƏ-nin İnformasiya Agentliyinə istinadla xəbər verir ki, bu sammit ən yaxşı investisiya fürsətlərini təqdim etmək və müzakirə etmək, dünya iqtisadiyyatını gücləndirmək və iqtisadi inkişafı təşviq etmək məqsədilə fəaliyyət göstərən mühüm beynəlxalq platformadır. Bu platforma iştirakçılara qlobal investisiya mənzərəsindəki ən son yenilikləri müzakirə etməyə, cari və gələcəkdəki çağırışlara cavab verməyə, həmçinin birgə uyğun həllər tapmağa imkan verir.
Sammit çərçivəsində bir sıra tədbirlər, forumlar, müzakirə sessiyaları, işgüzar görüşlər və yüksək səviyyəli görüşlər keçiriləcək. Bundan başqa, tədbirlər AIM İnvestisiya Mükafatları, startap müsabiqəsi və investisiya təqdimatları da daxil olmaqla 8 əsas sahəni əhatə edəcək.
Sammitdə, əsasən ağıllı kənd təsərrüfatı, enerji, infrastruktur, maliyyə və maliyyə bazarları, informasiya və kommunikasiya texnologiyaları, sənaye, tibbi turizm, biotexnologiya, tibbi texnologiyalar, əczaçılıq sənayesi, beynəlxalq ticarət, logistika və nəqliyyat, su texnologiyaları, turizm və təhsil sahələri ilə bağlı müzakirələr aparılacaq.
AZƏRTAC-ın xüsusi müxbiri
Qahirə
Bölmənin digər xəbərləri
