Ədalət İsmayılovun ixtiraçı təfəkkürünün bəhrəsi
Kiyev, 9 iyun (AZƏRTAC). Xarkovun mərkəzində, açıq səma altında əslən Bərdədən olan, hazırda isə Ukraynanın tanınmış konstruktoru və rasionalisti sayılan həmvətənimiz Ədalət İsmayılovun hazırladığı əlil arabasının təqdimatı olmuşdur.
Ə.İsmayılovun təklif etdiyi mexaniki ötürücü adi əlil arabasını istədiyin kimi hərəkət etdirmək imkanı verir. İlk baxışda sadə görünən konstruksiya belə hərəkət vasitələrinin üç problemini birdən həll edir: təhlükəsizliyi artırır, yığcamlığı təmin edir və başqasının köməyi olmadan bütün istiqamətlərdə hərəkət etməyə imkan verir.
Əlil arabasının təqdimatında iştirak edən Xarkov Əlillərə Yardım Xeyriyyə Fondunun başçısı İqor Qonçarenko bildirmişdir ki, bu yenilik barədə araba sahiblərindən müsbət rəylər eşitmişdir, lakin bir nəticəyə gəlmək üçün mütəxəssislərin rəyini gözləmək niyyətindədir.
Ədalət İsmayılovun sözlərinə görə, əlil arabaları istehsalında ixtisaslaşan Lvov müəssisəsinin mütəxəssisləri yeni ötürücü mexanizminin üstünlüklərini artıq qiymətləndirmişlər.
Qeyd edək ki, istedadlı ixtiraçı tərəfindən birvintli sxemi olan vertolyotun mühərrikinin prinsipial sxemi işlənmiş və reaktiv momentin kompensasiyası (RMK) mexanizmi variantı təklif edilmişdir.
Vertolyotun daşıyıcı vintinin RMK-sı üçün təklif edilən mexanizmin tətbiqi sükan vinti, habelə quyruq hissəsi uzun olmayan birvintli vertolyot yaratmağa imkan verir. Başqa sözlə desək, məlum pərqanadlı aparatlarla müqayisədə qabariti kiçik, uçuş kütləsi yüngül olan vertolyotlar yaradıla bilər.
Ədalət İsmayılovun ixtiraları Rusiyanın və Ukraynanın patentləri ilə qorunur. O, sərgi və müsabiqələrdə fəal iştirak edir. Məsələn, Ə.İsmayılov 2009-cu ildə Sevastopolda (Ukayna) “Yeni zaman” V Beynəlxalq ixtiralar və yeni texnologiyalar salonunda iştirak etmiş və xüsusi mükafata layiq görülmüşdür. 2010-cu ilin martında isə Moskvada keçirilən XIII Beynəlxalq ixtiralar və innovasiya texnologiyaları salonunda fəxri fərman və bürünc medal almışdır.
Ə.İsmayılov ixtiraçılıq hərəkatını təbliğ etmək məqsədi ilə texniki yaradıcılığa dair mühazirələr oxuyur, Xarkovda Azərbaycan diasporuna məxsus məktəbdə uşaqlarla məşğələlər keçir.
Zeynal Ağazadə
AZƏRTAC-ın xüsusi müxbiri
Kiyev
######
Bölmənin digər xəbərləri
