EKOLOGİYA VƏ TƏBİİ SƏRVƏTLƏR NAZİRLİYİ ÜMUMDÜNYA TORPAQ GÜNÜ ÇƏRÇİVƏSİNDƏ TƏDBİRLƏR KEÇİRƏCƏKDİR

14.04.2006 [21:49]
Çap et
A⁺ A^-

Ekologiya və Təbii Sərvətlər Nazirliyi aprelin 22-də qeyd olunan Ümumdünya Torpaq günü çərçivəsində bir sıra tədbirlər keçirəcəkdir. Nazirliyin mətbuat xidmətindən AZƏRTAC-ın müxbirinə bildirmişlər ki, onun bütün qurumlarının əməkdaşları ictimaiyyətin, KİV-lərin və qeyri-hökumət təşkilatlarının nümayəndələri ilə birlikdə meşəsalmada, ərazilərin təmizlənməsində və abadlaşdırılmasında iştirak edəcək, kütləvi informasiya vasitələrində maarifləndirici yazılar dərc olunacaqdır.

Tədbirlər aprelin 15-də Şamaxı rayonunda meşəsalma ilə başlanacaqdır. Burada 3 hektar sahədə 10 minə yaxın müxtəlif növ ağac əkiləcəkdir. Elə həmin gün nazirliyin Bakı departamentinin əməkdaşları paytaxtın Nərimanov rayonu məktəblərinin şagirdləri, tibb işçiləri ilə birlikdə buradakı Dədə Qorqud adına parkda iməcilik keçirəcəklər. Tədbirlər ayın axırınadək davam etdiriləcəkdir.

Xatırladaq ki, torpaq gününün keçirilməsi ənənəsi 30 il əvvəl ABŞ-da yaranmışdır. 1990-cı ilin həmin günü dünyanın 141 ölkəsindən 200 milyon adamın iştirakı ilə beynəlxalq aksiya keçirilmişdir. 2000-ci ildə aksiyaya artıq dünyanın 181 ölkəsindən yüz milyonlarla adam qatılmışdı. Xarici KİV-lərin məlumatına görə, dünyanın müxtəlif ölkələrində həmin gün konfranslar, sərgilər, ərazilərin təmizlənməsi və ağac əkilməsi kimi tədbirlər həyata keçirilir.

EKOLOGİYA VƏ TƏBİİ SƏRVƏTLƏR NAZİRLİYİ ÜMUMDÜNYA TORPAQ GÜNÜ ÇƏRÇİVƏSİNDƏ TƏDBİRLƏR KEÇİRƏCƏKDİR

MÜƏLLİFLƏ ƏLAQƏ

Bölmənin digər xəbərləri