Ekologiya və Təbii Sərvətlər Nazirliyinə daxil olmuş şikayət məktubu araşdırılmışdır
Bakı 23 dekabr (AZƏRTAC). Ekologiya və Təbii Sərvətlər Nazirliyinə (ETSN) Neftçala rayon Mirqurbanlı kəndinin bir qrup sakini adından şikayət məktubu daxil olmuşdur.
Belə ki,“Azər-Yod” MMC-yə məxsus Neftçala yod zavodunda xlorun, kükürd qazlarının, yod və sulfat turşularının atmosferə buraxılması, eləcə də yodlu suyun nəql olunan boru xəttindən torpağa sızaraq törətdiyi şoranlaşma ilə əlaqədar daxil olmuş şikayət məktubu Nazirliyin Ətraf Mühitin Mühafizəsi Departamentinin əməkdaşları, “Azər-Yod” MMC-nin icraçı direktoru A.Abdullayevin və şikayətçilərin iştirakı ilə yerində araşdırılmışdır.
ETSN-dən AZƏRTAC-a verilən məlumata görə, aparılan araşdırma zamanı müəssisədə yod emalı prosesində atmosferə xlorun, kükürd qazlarının, yod və sulfat turşularının buraxılması hallarının olmadığı, lakin “Azər-Yod” MMC-nin Neftçala yatağının 954, 712, 904, 982, 961 və 962 saylı quyularından çıxarılan yodlu suyun toplandığı 80 saylı çənin ətrafına mədən suyunun sızması müəyyən edilmişdir.
Faktla bağlı akt tərtib edilmiş, çatışmazlıqların aradan qaldırılması məqsədi ilə “Azər-Yod” MMC-nin rəhbərliyinə müddətli məcburi göstəriş verilmişdir.
Bölmənin digər xəbərləri
