Ekspert: Avropa Türkiyə və Azərbaycanla əməkdaşlığın dəyərini bilməlidir
Ankara, 20 iyun, AZƏRTAC
Avropa Parlamentinin (AP) bəzi üzvlərinin Türkiyə və Azərbaycana qarşı qərəzli münasibəti ziddiyyətlərin və Avropanın öz daxilində vahid bir vizyonun olmamasının nəticəsidir.
Bu fikri AZƏRTAC-a müsahibəsində Türkiyənin Qars şəhərindəki Qafqaz Universitetinin dosenti və beynəlxalq münasibətlər üzrə ekspert Halit Hamzaoğlu bildirib.
Onun sözlərinə görə, Avropa dairələrində praqmatistlər Ankara və Bakı ilə əməkdaşlığın vacibliyini qəbul edirlər, populistlər isə hakimiyyət uğrunda mübarizədə seçicilərin hissləri ilə oynayırlar.
O, Avropada çoxsaylı xroniki problemin mövcudluğunu qeyd edib: “Avropadakı bəzi siyasətçilər Türkiyə və Azərbaycan kimi güclü və sabit dövlətləri tənqid etməklə, həm də ictimaiyyətin diqqətini daxili böhranlardan xarici gündəmə yönəltməyə çalışır və bununla da onların həllini gecikdirirlər. Buna görə də AP-nin radikal üzvləri mövqelərini Türk dünyasından uzaqlaşmaq da daxil olmaqla, Avropaya aid olmayan hər şeyin maksimum dərəcədə rədd edilməsi üzərində qururlar”.
Universitet dosentinin sözlərinə görə, Avropadakı mövcud vəziyyətin səbəblərindən biri də liderliyin olmamasıdır, Türkiyə və Azərbaycan isə ölkələrinin gələcəyi üçün aydın vizyona malik güclü dövlət xadimləri tərəfindən idarə olunur.
H. Hamzaoğlu əmindir ki, iki qardaş ölkəyə qarşı yönələn əsassız tənqidlər Qərbdə Türkiyə və Azərbaycanın artan təsir və gücünü, həmçinin bu iki dövlətin müstəqil siyasət kursunu qəbul etmək istəməyən müəyyən dairələrin əlində bir vasitədir.
Ekspert Avropa İttifaqı nümayəndələrinin Bakı ilə enerji əməkdaşlığının vacibliyi barədə realist açıqlamalarını və Avropa Parlamentindəki bəzi liberalların Azərbaycana qarşı əsassız tənqidlərini “açıq-aşkar dissonansın göstəricisi” adlandırıb. Nəticədə AP-nin mövqeyi Avropa İttifaqının maraqlarına maneəyə çevrilir: “Aİ-də praqmatistlər və təmənnalı liberallar arasındakı mübarizə bütün müasir Avropaya mənfi təsir göstərir və bəzən absurd tənqidlərə səbəb olur. Əks halda, Avropa enerji təhlükəsizliyinin əsas aktorlarından biri olan Azərbaycanla dialoqu pozmaq cəhdlərini izah etmək mümkün deyil”.
Qafqaz Universitetinin müəllimi Aİ strukturlarının ziddiyyətli siyasətinin uzunmüddətli perspektivdə davam edə bilməyəcəyinə əminliyini ifadə edib: “Onlar tərəfdaşlarını dəqiq müəyyənləşdirməli və dəyərləndirməlidirlər. Başqa hər hansı bir kurs Avropanın özünə ciddi ziyan vuracaq”.
Bölmənin digər xəbərləri
