Əlcəzairin Makronun məktubuna sərt cavabı: Ölkə təzyiqlərə boyun əyməyəcək TƏHLİL
Paris, 8 avqust, AZƏRTAC
Fransa Prezidenti Emmanuel Makronun avqustun 6-da Baş nazir Fransua Bayrouya ünvanladığı məktub Paris və Əlcəzair arasında diplomatik gərginliyi daha da artırdı. Fransanın dövlət başçısı bu sənəddə Əlcəzair diplomatları üçün vizasız rejimin dayandırılmasını tələb etməklə, münasibətlərdə yeni bir sərtlik mərhələsinə keçdiyini nümayiş etdirdi.
AZƏRTAC xəbər verir ki, bu addıma cavab olaraq Əlcəzair Xarici İşlər Nazirliyi (XİN) rəsmi bəyanat yayaraq, Fransanı böhranın əsas səbəbkarı kimi göstərdi və öz mövqeyini aydın şəkildə ortaya qoydu.
Əlcəzair diplomatiyası bəyan edir ki, Makronun məktubunda Fransa öz məsuliyyətindən tam şəkildə yayınaraq bütün günahı Əlcəzairin üzərinə atır. “Bu, nə həqiqətə, nə də reallığa uyğundur,” – deyə nazirlik bildirir. Əlcəzair tərəfi vurğulayır ki, yaranmış hər bir diplomatik gərginlik mərhələsində onların addımları beynəlxalq hüquqa və “qarşılıqlılıq prinsipinə” uyğun olub.
XİN-in bəyanatında, həmçinin qeyd olunur ki, Fransa özünü ikitərəfli və beynəlxalq öhdəliklərə riayət edən dövlət kimi təqdim etməyə çalışsa da, əslində, 1968-ci, 1974-cü və 2013-cü illərdə imzalanmış Fransa-Əlcəzair sazişlərini pozan tərəf məhz Fransadır.
Əlcəzair qəti şəkildə bəyan edir ki, ölkə heç bir formada təzyiqə, hədə-qorxuya və ya şantaja boyun əyməyəcək. Nazirliyin fikrincə, Fransanın məqsədi qanuni əsas olmadan Əlcəzair vətəndaşlarını ölkədən çıxarmaq və onların hüquqi müdafiə imkanlarını məhdudlaşdırmaq olub. Bəyanatda qeyd olunur ki, Fransa ilk gündən böhranı “güc münasibətləri” formatında idarə edib – göstərişlər, ultimatumlar və birtərəfli tələblərlə. Bu isə ikitərəfli münasibətlərə zərbə vurur.
Makronun 2013-cü ildəki viza azadolma sazişini dayandırması fonunda Əlcəzair diplomatiyası xatırladır ki, bu sazişin təşəbbüskarı Fransa olub. İndi isə Paris bu razılaşmanı birtərəfli şəkildə dayandıraraq Əlcəzairə qarşı diplomatik təzyiq vasitəsinə çevirib. Əlcəzair isə bu qərarı “uyğun fürsət” adlandıraraq, eyni sazişdən çıxmaq və fransız diplomatlara da viza tətbiq etmək qərarını elan edib. Bundan sonra Fransa diplomatlarının Əlcəzairə giriş şərtləri Parisin Əlcəzair diplomatlarına qoyduğu şərtlərlə eyni olacaq.
Əlcəzair hökuməti, həmçinin Fransa ilə mübahisəli məsələlərin yalnız diplomatik yollarla həll olunmasını dəstəklədiyini bildirir. Fransa tərəfindən irəli sürülən narahatlıqlarla yanaşı, Əlcəzair də öz gündəmini və problemlərini Fransa tərəfinə çatdırmaq niyyətindədir. Fransanın viza-rədd və readmissiya mexanizmini yenidən işə salmaq istəyi isə Əlcəzair tərəfindən ciddi şəkildə tənqid olunur. XİN bildirir ki, bu tədbir həm 1968-ci il sazişinə, həm də Avropa İnsan Hüquqları Konvensiyasına ziddir. Əlcəzair Fransadakı vətəndaşlarının hüquqlarını qorumaq üçün konsulluq dəstəyini davam etdirəcəyini və hüquqi müdafiəni gücləndirəcəyini qeyd edir.
Əlcəzairin cavabı Fransa ilə münasibətlərdəki tarazlığı qorumaq və ölkəsinin beynəlxalq nüfuzunu müdafiə etmək məqsədi daşıyır. Makronun sərtləşən mövqeyinə qarşı Əlcəzair eyni dərəcədə prinsipial və hüquqi əsaslı cavab verir. İndi diqqətlər iki ölkənin qarşıdakı aylarda atacağı addımlara yönəlib. Əməkdaşlığa doğru yeni bir səhifə açılacaq, yoxsa qarşılıqlı sanksiyaların dövrü başlayacaq? Bunu zaman göstərəcək.
Bölmənin digər xəbərləri
