Elçin Mirzəbəyli: Bakı-Berlin münasibətlərində qarşılıqlı faydalı əməkdaşlıq perspektivləri genişlənməkdədir
Bakı, 3 aprel, AZƏRTAC
Prezident İlham Əliyevin Almaniya Prezidenti Frank-Valter Ştaynmayerin Azərbaycana rəsmi səfəri zamanı mətbuata bəyanatında səsləndirdiyi fikirlər iki ölkə arasında əməkdaşlıq perspektivlərinə dair mühüm istiqamətləri əks etdirir. Bu səfər Azərbaycan-Almaniya əməkdaşlığının yeni mərhələyə qədəm qoyduğunu və tərəflərin qarşılıqlı maraqlara əsaslanan münasibətləri dərinləşdirmək niyyətində olduqlarını təsdiqləyir. Prezident İlham Əliyevin bəyanatında vurğulanan əsas məqamlardan biri 2024-cü ilin ilk iki ayında Almaniya ilə ticarət dövriyyəsinin təxminən üç dəfə artmasıdır. Bu artımın əsas səbəbi Azərbaycanın Almaniyaya xam neft ixracını artırması ilə bağlıdır. Bu, Azərbaycanın enerji sektorundakı mövqeyini daha da möhkəmləndirməklə yanaşı, Almaniya kimi sənaye baxımından güclü bir dövlətin ölkəmizin enerji bazarına marağını göstərir.
Bununla yanaşı, prezidentlərin başçılarının görüşü zamanı bərpaolunan enerji sahəsində əməkdaşlıq imkanlarına da toxunuldu. Azərbaycan 2030-cu ilə qədər bərpaolunan enerji istehsal gücünü 6 giqavata çatdırmağı planlaşdırır ki, bu, həm daxili enerji təhlükəsizliyinə, həm də ixrac potensialının artırılmasına xidmət edir. Almaniyanın bu sahədəki təcrübəsi ilə Azərbaycanın iddialı enerji proqramları arasında sinerji yarana bilər.
Bu fikirləri AZƏRTAC-a açıqlamasına Milli Məclisin deputatı Elçin Mirzəbəyli söyləyib.
Prezidentlərin mətbuata bəyanatlarında diqqətçəkən məqamlarından birinin də Ermənistanın COP29-da iştirak etməməsi və bunun fonunda Azərbaycan-Ermənistan münasibətlərində normallaşma prosesinin irəliləməməsi məsələsi olduğunu deyən deputat bildirib: “Bu məsələdə Azərbaycanın diplomatik mövqeyi açıq şəkildə ifadə olunub. Rəsmi Bakı regional sabitliyin təmin olunması üçün beynəlxalq platformalardan istifadə etməkdə maraqlıdır. Ermənistanın COP29-u boykot etməsi isə bu ölkənin regional inteqrasiya proseslərində hələ də tərəddüd etdiyini göstərir”.
Bəyanatda vurğulanan digər mühüm məqam isə ABŞ-Avropa İttifaqı, Rusiya-Qərb münasibətlərindəki gərginlik fonunda Azərbaycanın xarici siyasət kursu oldu. Prezident İlham Əliyevin bu məsələlər üzrə açıq fikir mübadiləsinin aparılmasını xüsusi qeyd etməsi Azərbaycanın ənənəvi, milli maraqlara və beynəlxalq hüquqa söykənən xarici siyasətini davam etdirmək niyyətində olduğunu göstərir.
Almaniya Prezidentinin Azərbaycana ilk rəsmi səfəri və müzakirə olunan məsələlər göstərir ki, Bakı-Berlin münasibətlərində qarşılıqlı faydalı əməkdaşlıq perspektivləri genişlənməkdədir. Enerji təhlükəsizliyi, ticarət və siyasi dialoq sahələrində konkret addımların atılması hər iki tərəf üçün strateji əhəmiyyət daşıyır. Azərbaycan özünü etibarlı tərəfdaş kimi təqdim və sübut etməklə həm regional, həm də qlobal səviyyədə mövqeyini daha da gücləndirməyə çalışır. Bu istiqamətdə əldə edilən ciddi nəticələr göz qabağındadır”.
Deputat Almaniyanın 2022-ci ildən alternativ enerji mənbələri axtardığını xatırladaraq bildirib: “Azərbaycan artıq Aİ-nin enerji təhlükəsizliyində strateji oyunçuya çevrilib. Xəzər regionunun qaz ehtiyatları və gələcəkdə bərpaolunan enerji ixracı Berlin üçün Bakı ilə əməkdaşlığın aktuallığını daha da artıra bilər.
Bununla yanaşı, Azərbaycan Şərq-Qərb və Şimal-Cənub nəqliyyat dəhlizlərinin əsas aktorlarından biridir. Çin, Mərkəzi Asiya və Türkiyəni Avropa ilə birləşdirən Bakı-Tbilisi-Qars (BTQ) dəmir yolu və Zəngəzur dəhlizi kimi layihələr Almaniya üçün mühüm nəqliyyat marşrutları hesab olunur.
Azərbaycanın Cənubi Qafqazda lider aktor olması və Ermənistanla sülh prosesində irəliləyiş əldə etməsi Almaniyanın geosiyasi maraqlarına uyğundur. Bundan əlavə, Almaniya Azərbaycanın Mərkəzi Asiya ilə tarixi, etnomədəni və etnososial aspektlərə söykənən münasibətlərinin əhəmiyyətini, bu regionda öz iqtisadi mövcudluğunu genişləndirmək üçün Bakının nə dərəcədə mühüm mövqeyə malik olduğunu çox yaxşı başa düşür. Qənaətimə görə, Almaniya daha praqmatik siyasət yürütmək niyyətindədir”, - deyə E. Mirzəbəyli vurğulayıb.
Bölmənin digər xəbərləri
