“Ələt-dəniz” və “Bulla-dəniz” yataqlarında ekoloji monitorinq aparılmışdır
Bakı, 8 dekabr (AZƏRTAC). Azərbaycan Respublikası Dövlət Neft Şirkətinin mətbuat xidmətindən AZƏRTAC-a bildirmişlər ki, su səthinin və dəniz dibinin kimya və biologiyasının tədqiqi məqsədi ilə “Azneft” İstehsalat Birliyinin N.Nərimanov adına NQÇİ-nin istismarında olan “Ələt-dəniz” və “Bulla-dəniz” yataqlarında növbəti ekoloji monitorinq keçirilmişdir. Monitorinq müddətində Xəzər dənizinə təsir göstərən parametrlərin müəyyənləşdirilməsi üçün yatağın seçilmiş stansiyalarından dəniz suyu, zooplankton və dib çöküntüsü nümunələri götürülmüş, həmçinin su mühitinin fiziki-kimyəvi xarakteristikaları öyrənilmiş, dəniz axınlarının sürət və istiqaməti ölçülmüş, ərazinin meteoroloji tədqiqatı aparılmışdır.
Monitorinq zamanı su mühitinin müxtəlif dərinliklər üzrə fiziki-kimyəvi parametrləri tədqiq edilmiş və yaz mövsümündə aparılmış ekoloji monitorinqin nəticələri ilə müqayisə olunmuşdur. Müqayisəli təhlil zamanı “Ələt-dəniz” yatağında dəniz suyunun duzluluğunun mövsümlər üzrə dəyişməsi müəyyən edilmişdir. Götürülmüş nümunələr kompleks tədqiqat laboratoriyasında ətraflı tədqiq edildikdən sonra alınmış nəticələr üzrə analitik təhlillərin aparılması nəzərdə tutulmuşdur.
Bölmənin digər xəbərləri
