SİYASƏT
Əliqismət Bədəlov: Paşinyan Münxendə bu dəfə də özünü gülünc vəziyyətə saldı
Bakı, 23 fevral, AZƏRTAC
Prezident İlham Əliyevin 59-cu Münxen Təhlükəsizlik Konfransı çərçivəsində Almaniyaya səfəri zamanı keçirdiyi görüşlər və Cənubi Qafqazda təhlükəsizlik məsələləri ilə bağlı Konfransın sədri Kristof Heusgenin moderatorluğu ilə iclasdakı çıxışı dünya ictimaiyyətinin nümayəndələri, tanınmış ictimai-siyasi xadimlər, həmçinin beynəlxalq ekspertlər tərəfindən böyük maraqla qarşılanıb. Dövlətimizin başçısı ölkəmizin maraqlarını sistemli, beynəlxalq hüququn normalarına və ədalətə əsaslanan şəkildə müdafiə etməsi hər bir soydaşımız üçün qürurvericidir. ABŞ Dövlət katibi Antoni Blinkenin vasitəçiliyi ilə təşkil olunmuş üçtərəfli görüşdə də Azərbaycanın haqlı mövqeyinin dəstəklənməsi, dövlətimizin başçısının plenar iclasda qətiyyətlə bəyan etdiyi “Azərbaycanda Dağlıq Qarabağ kimi inzibati vahid yoxdur” ifadəsi həyata keçirilən uğurlu xarici siyasətin növbəti təzahürüdür.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, dövlətimizin başçısı həm keçirdiyi görüşlərdə, həm də “Dağları aşmaq? Cənubi Qafqazda təhlükəsizliyin qurulması” mövzusunda təşkil edilən plenar iclasda bir çox məsələlərə aydınlıq gətirdi. Məsələn, indiyədək həm Ermənistanın dövlət rəsmləri, həm də ermənipərəst təşkilatlar Laçın-Xankəndi yolunda ekofəalların, könüllülərin və QHT nümayəndələrinin ölkəmizin təbii sərvətlərinin ermənilər tərəfindən istismar olunmasına etiraz edərək keçirdikləri dinc aksiya barəsində dünya ictimaiyyətinə yalan və qərəzli məlumatlar verirlər. Guya, aksiya iştirakçıları yolu bağlamaqla Qarabağda yaşayan erməniləri blokadada saxlayıblar və onları “humanitar fəlakətlə” üz-üzə qoyublar. Ermənistanın baş naziri Nikol Paşinyan iclasdakı çıxışı zamanı əlinə düşmüş fürsətdən istifadə edərək yalan və böhtanları bir-birinin ardına düzdü, vay-şüvənlik salaraq dedi ki, həmin ərazidə yaşayan ermənilər acından və soyuqdan qırılıb-batırlar. Onun dediklərinə inanan moderator Prezident İlham Əliyevə “Siz humanitar jest edə bilərsinizmi ki, bu blokadaya son qoyulsun və baş nazirin dediyi kimi, Dağlıq Qarabağdakı insanlar çox ağır şəraitdə yaşayırlar”, - deyə müraciət etdi və dərhal da layiqli cavabını aldı.
Ə.Bədəlov bildirib ki, dövlətimizin başçısı moderatora cavabı ilə həm Ermənistanın baş nazirini, həm də onun havadarlarını ifşa etdi: “Sanki moderator da “Dağlıq Qarabağ” ifadəsini işlətməkdə peşman oldu. Çünki Prezident İlham Əliyev qəti olaraq bildirdi ki, “Dağlıq Qarabağ” sözü artıq qüvvədən düşüb və Azərbaycanda bu adda inzibati vahid yoxdur. Dövlətimizin başçısı əsası olmayan belə ifadə işlədənlərə müraciət edərək onları Azərbaycanın suverenliyinə və Konstitusiyasına hörmətlə yanaşmağa dəvət etdi. Onların diqqətinə çatdırdı ki, Azərbaycanda erməni əhalinin olduğu Qarabağ rayonu var”.
Siyasi şərhçi qeyd edib ki, dövlətimizin başçısının səsləndirdiyi faktlar da təsdiqlədi ki, Laçın-Xankəndi yolunda keçirilən dinc aksiyanı blokada kimi dərk edənlər yanılırlar. Bunu necə blokada adlandırmaq olar ki, dinc aksiyanın başlandığı ötən il dekabrın 12-dən indiyə qədər həmin ərazidən 2500-dən çox nəqliyyat vasitəsi, o cümlədən Beynəlxalq Qırmızı Xaç Komitəsinin maşınları keçib. Yeri gəlmişkən, Qırmızı Xaç Komitəsi tərəfindən Qarabağdan 100-dən artıq xəstə müalicə olunmaq üçün Ermənistana aparılıb. Əgər bu yolda blokada yaradılıbsa, Qarabağda ara qarışdırmaqla məşğul olan, dinc əhalini müharibəyə səsləyən “dövlət naziri” Vardanyan oradan Moskvaya, Moskvadan Ermənistana, yenidən Qarabağa necə qayıdıb? Azərbaycan çoxmillətli ölkədir. Respublikadakı bütün azlıqlar, o cümlədən Qarabağ erməniləri də azlıq kimi, təhlükəsizlik də daxil olmaqla, eyni hüquq və üstünlüklərdən faydalanırlar. Dövlətimizin başçısı Konfrans çərçivəsində həm ABŞ Dövlət katibi Blinkenə, həm də Ermənistanın baş naziri ilə görüşü zamanı bu barədə demişdi. Ancaq Rusiya vətəndaşı, cinayətkar oliqarx, Avropada çirkli pulların yuyulmasında əli olan və hazırda Qarabağda “dövlət naziri” pərdəsi altında ara qarışdıran Vardanyan Qarabağda erməni icmasının nümayəndələri ilə praktiki təmaslara başlamağa imkan vermir.
Paşinyanın Münxendə bu dəfə də özünü gülünc vəziyyətə saldığını deyən Ə.Bədəlov əlavə edib: “Prezident İlham Əliyev deyir ki, Ermənistan Azərbaycan ərazisini işğal edərkən bir milyon azərbaycanlını evindən didərgin salmış, 67 məsciddən 65-ni dağıtmış, onları təhqir etmişdir...Paşinyanın isə bu fakta verdiyi cavaba diqqət yetirin: “Sovet dövründə Azərbaycanda təxminən, 1560 məscid dağıdılmışdı”. Söhbət Ermənistanın Azərbaycan torpaqlarını işğal etdiyi zaman 65 məscidin dağıdılmasından gedir, Paşinyan isə sovet dövründə məscidlərin dağıdılmasından danışır. Bu da erməni baş nazirin qeyri-ciddiliyini bir daha təsdiqlədi.
Siyasi şərhçi Prezident İlham Əliyevin Fransaya mesaj göndərdiyini də xatırlatdı: ”Biz ABŞ, Rusiya və indi də Avropa İttifaqı tərəfindən təşkil olunmuş platformada bir araya gəlmişik. Lakin Fransa, qeyd-şərtsiz Ermənistanın mövqeyindən çıxış etdiyinə və Avropa İttifaqının Prezidenti Şarl Mişelin dəstəyi ilə əldə olunmuş razılıqların icrasına mane olduğuna görə danışıqlarda vasitəçi ola bilməz”.