Elmar Babanlı: Azərbaycan Cüdo Federasiyasının baş katibi vəzifəsinə yeni təyinat gözlənilir
Bakı, 16 noyabr, AZƏRTAC
Azərbaycan Cüdo Federasiyasının rəhbərliyində dəyişikliklərdən sonra yeni təyinatların da olacağı gözlənilir. Belə ki, yaxın zamanda federasiyanın baş katibi postuna yeni təyinat gözlənilir.
Bununla bağlı AZƏRTAC-ın sorğusunu cavablandıran qurumun baş katibi Elmar Babanlı artıq istefa ərizəsini yazdığını bildirib: “Federasiyada tutduğum vəzifədən azad olunmağım barədə ərizəmi artıq yeni rəhbərliyə təqdim etmişəm. Çox yaxın zamanda bu vəzifəyə yeni təyinatın olacağına ümid edirəm”.
E.Babanlı istefa verdikdən sonra da ehtiyac yaranarsa federasiyaya kömək və dəstək verəcəyini vurğulayıb: “Bu yaxınlarda cüdo üzrə “Böyük dəbilqə” turnirinin yüksək səviyyədə təşkili üçün ciddi səy göstərdik. Yəni, federasiyanın əvvəlki texniki heyəti ehtiyac yaranarsa köməyini və dəstəyini əsirgəməyəcək. Fəaliyyətimi “Neftçi” idman klubunda baş menecer kimi davam etdirirəm”.
Bölmənin digər xəbərləri
